[dropcap]Ч[/dropcap]Iяйннал шяраваллил школа хьуссар лакрал чIявусса оьрчI-душварал цалчинсса кIулшиву ларсъсса школану. ХIакьинугу лахъсса къуллугъирттай зий бур ва школа къуртал бувсса оьрчI-душру.
Ванийну на учин ччай ура, ЧIяйннал шяраву школа тIивтIуну ттуршунния лирчусса шинну хьуну дунугу, хIакьинугу хъинну куртIсса кIулшивуртту дуллалисса учительтурал коллектив бур ва школалий куну. Ванинсса барану хъанан бикIай райондалий, республикалий шайсса учительтурал ва дуклаки оьрчIал дянивсса конкурсирттай, олимпиадарттай ва школалул учительтурал, дуклаки оьрчIал хьхьичIунмайсса кIанттурду бугьлай бикIайшиву.
[dropcap]В[/dropcap]ана уттигъанну, цал райондалий ххув хьуну, яла республикалий хьусса лакку мазран хас дурсса олимпиадалий цалчинмур кIану бувгьуну бувкIунни ЧIяйннал школалул 10-мур классрал дуклаки душ Гулмира СутIаева. Явара, ва душ цуппагу, ца дарсирал бакъагу, гьарца чулухунмайва бюхъу ххисса бур. Уттигъанну райондалул дуклаки оьрчIал дянив хьусса «Уттарасса классика» тIисса конкурсрайгу ванил цалчинмур кIану бувгьунни. Мукунма ванил цалчинмур кIану бувгьунни «Дагъусттаннал тарих» тIисса конкурсрайгу. Ца душнил шанна ххувшаву – му чIивисса иш бакъар.
Умуд бур, школалий кунма, Гулмира вания гихунмайсса оьрмулувугу хъуни-хъунисса ишру, мурадру бартбигьлагьисса ватанчи хьунссар тIисса. Барча вил ххувшавуртту, Гулмирай!
