Ларгсса нюжмар кьини Гъумучиял школалий хьунни хъунасса учитель-математик Маммаев Нураттин МахIаммадлул арснал аьпалун
хас дурсса математикалул олимпиада.
Олимпиада цалчин дурссар ларгсса шинал Нураттин Маммаев дунияллийн увккун 90 шинал юбилейран хас дурсса мероприятиярттал лагрулий.
Зулайхат Тахакьаева
Мунил сакиншинначину бия Нураттиннул арс, душру, гъан-маччами, Лакрал райондалул администрациялул ва кIулшиву дулаврил управлениягу гьурттуну.
Бусалардавун агьсса муаьллим дакIнийн утан бувкIун бия мунайн барчаллагьрайсса учениктал, райондалул жямат, гъан-маччами. Бусравсса хъамалну бия ДР-лул Хъунисриннал советрал хъунаманал хъиривчу Сиражуттин Илиясов, жяматийсса ишккакку МахIаммад Айдаев, МахIачкъала шагьрулул 39-мур лицейрал математикалул учительница Зумруд АьбдурахIманова ва цаймигу.
Олимпиада дайдишин хьхьичI дуклаки оьрчIал ва хъамаллурал тIутIив дирхьунни Нураттин Маммаевлул аьпалул ула лархъсса чIирацI.
Мажлисрал байбихьулул махъ лавхъуна Лакрал райондалул бакIчи Юсуп МахIаммадовлул.
Олимпиада дан кабакьу бувминнахь ва ппу дакIнийн утан бувкIминнахь барчаллагьгу куну, Нураттин Маммаевлул арснал, Дагъусттаннал ПаччахIлугърал медициналул университетрал ректор Сулайман Маммаевлул увкуна:
— Билаятрал ца яла хьхьичIунсса вузран ккаллисса Москавуллал паччахIлугърал университетрал захIматсса механикалул ва математикалул факультет къуртал бувсса, ччимур къуллугърай хъуншагьрулий хIурмат лавайну икIан бюхъайсса даражалул кIулшиву ларсъсса инсан шяраву школалий дарс дихьлан учIаврий хIакьинусса кьинигу инсантал махIатталнува ливчIун бур. Махъсса шиннардий жагьилсса пишакартал шяраваллил кIанттайн кIункIу баншиврул паччахIлугърал чулуха миннан кабакьулунсса программартту зузи дурну духьурчагу, шяраваллавунмай специалистал букIлай бакъашиву хIисав барча, цила чIумал ттул ппу шяравун зун учIаву хъинну чумартсса тIулун хIисав дувай инсантурал. Ватандалухсса ччаву ялтту дуркхьунссия ттул буттал, бусса оьрму шяраваллил кIанттай оьрчIан кIулшиву дулаврин хас бувнавхьур.
Абакар Къюннуев, Лакрал райондалул администрациялул бакIчинал хъиривчу:
— Нураттин МахIаммадовичлун хъинну ххирая математика. Гьарца дарс дакIнивух, къюкIливух дуккан дайва, гьухъа ивтун уккайва гьарца дарсирая. Дарс къадурчIусса цуя-ца оьрчI классраву къаличIайва. ДГУ-рал математикалул факультетрайн дуклан ухлахийни математикалул экзамендалий ттуща бювхъуна 45 минутIрал дянив цинярда заданияртту биттур дан, му Нураттин МахIаммадовичлул дуллусса кIулшивурттал хIасилли.
Нураттиннущал Москавлив дуклай ивкIсса аьлимчу, профессор Мухтар Аьлишаев:
— Нураттин жуяргу итххявхсса, цимигу даражалул хьхьичIун ливчусса икIайва, амма школалийн зун лавгуна, оьрчIахагу, цала пишалухагу чIалачIин дакъасса ивкIун тIий. Га ччаву ганаща бювхъуна жул дакIурдивунгу рутан. Цанчирча, хIакьину кунма, жул заманнайгу сийлий экономистнал ва юристнал пишарду бивкIхьурчагу, Нураттин МахIаммадовичлул дарс дирхьусса оьрчIал чIявуминнал математикнал пиша язи бугьайва.
Малик Гъапуров, физико-математикалул элмурдал доктор:
— Ххарину ура олимпиада аьдатравун дагьаврия. ДукIусса юбилейран хас дурну, мунийну къуртал хьунсса ххай уссияв. Математика куртIну лахьлахьисса школалул дуклаки оьрчIру ва олимпиадалий гьуртту хьун бучIавриягу оьрчIан хъунмасса мюнпат хьунтIиссар…
МахIачкъала шагьрулул КIулшиву дулаврил управлениялул каялувчинал хъиривчунал къуллугърай зузисса, Нураттин Маммаевлул душнил Зумруд Багъдуевал кIицI лавгунни Зумруд АьбдурахIмановал сипталийну 39-мур лицейраву шагьрулул школарттал дуклаки оьрчIал дянив шинал лажиндарай дуллай бивкIшиву Нураттин Маммаевлул аьпалун хас дурсса математикалул конкурсру.
Махъра-махъсса конкурсру утти хьуссар учительнал ватандалий. Олимпиадалий гьуртту хьунни 8-11-ми классирттаву дуклакисса мукьцIалуннийн бивсса оьрчIру.
ОьрчIал давурттан кьимат бишлай ия итххявхсса оьрчIансса центрданул директор ХIабибуллагь ХIабибуллаев. ХьхьичIунсса кIанттурду бувгьусса оьрчIан буллунни сакиншинначитурал чулухасса дипломру ва арцуйнусса бахшишру. Арцуйнусса бахшишру дуллунни дуклаки оьрчIащал математикалул мастер-класс бан бувкIсса МахIачкъала шагьрулул 39-мур лицейрал дуклаки оьрчIан ва гайннал каялувчи Зумруд АьбдурахIмановангу.
ХьхьичIунсса кIанттурду бувгьуми барча буллай, Юсуп МахIаммадовлул кIицI лавгунни пикри бушиву ялунчIил олимпиадалул лагру гьарта-гьарза дан.
