Уттигъанну МахIачкъалалив хьунабавкьунни ЧIяйннал дянивмур даражалул школа 1969-ку шинал къуртал бувну бивкIми.
[dropcap]В[/dropcap]а выпускрал оьрчIру-душру хьхьичIавагу хьунабавкьуссия ЧIяйннал школалий. ЦIанасса хьунабакьаврил хьхьичIунма сиптачину хьуну ия Ккуллал райондалул ветлечебницалул хъунама хIакин ЦIущарниясса Мирзаев Аьппас. Хьунабакьаву щаллу дуллай, мунацIун кабавкьуну бия Буттаева Асял, МахIаммадова Бадиржигьаннул, Ванатиева Анял, Рамазанова Гуржагьрал.
Хьунабакьаврийн бувкIун бия: Мирзаев Аь., Буттаев И., Маккаев С., Мусиев Б., Кьубатаев А., ХIамзаев А., Буттаев Ш., Илиясов Т., Мусаев Ш., Мамаев А., ХIасанов И., Шамсулов А., МахIаммадов Г., ХIасанов М., Далиева П., Ванатиева А., Рамазанова Г., Буттаева А., МахIаммадова Б.
ЛичIи-личIисса дайшишру хьхьичIун дагьну, къабувкIссагу хьунни. Хьунабакьаву дия «Инт» тIисса кафелуву.
Байбихьулийва, циняв лавай бивзун, алхIам бувккуна жуятува лавгсса учительтурах ва чIун архIал оьрчIах.
Миккува цинявннал барча бувна философиялул элмурдал доктор Буттаева Асият, профессорнал цIа дулаврийн бувну.
ЧIявусса дакIнийн бичавуртту дия учительтурая, цала оьрчIшиврия. ДакIнийн бичинмургу чансса бакъая. Хьуна дялахъру, дакIнийхтунусса балайрду увкуна Буттаева Асиятлул. Цала аккордеонгу бивщуну, балай увкуна Мирзаев Аьппаслулгу.
ЧIалай бия 1969 шиналсса ЧIяйннал школалул выпускрал оьрчIру бивкIшиву гьунар бусса, мяйжаннугусса патриотътал ва ххаллилсса инсантал.
Ахирданийгу, циняв рязи хьуну, хIукму барду гьарца шинах хьунабакьаван вава кафелуву, июль зуруй.
Ирбагьина ХIасанов
