Вай гьантрай Дагъусттаннал бияврил искусствардал центрданий хьусса каратэлул турнирданий гьуртту хьунни МахIачкъалаллал, Хасавюртуллал, ЦIуссалакрал райондалул спортклубирттавасса 65 спортсмен.
Бяст-ччаллу байбихьлахьисса мажлисрай оьрчIру барча бунни ва миннан тIайлабацIу чIа увкунни турнирданул сакиншинначи Арсен ХIаммадовлул.
Шикку гьуртту хьусса цинявппагу спортсментал бия хъинну итххявхсса, каратэлул техника ларайну кIулсса.
АцIра шинавусса спортсментураву цалчинсса кIантту бувгьунни Кьурбанов Кьурбаннул ва ХIусниев АхIмадхIажинал. Мяйра-урчIра шинавусса спортсментураву кIилчинсса кIантту бувгьунни Айдаев МахIаммадлул ва Давдиев Шяъваннул. Сивсуну данди увксса арулла шинавусса спортсмен Матыгов Увайслун дуллунни ХIурматрал грамота.
КIицI лаганну ЦIуссалакрал райондалул ДЮСШ-рал спортсментал личIи-личIисса спортрал соревнованиярттай мудангу чялишну гьуртту шайшиву ва хьхьичIунсса кIанттурду бугьайшиву.
ХIадур бувссар
Имара Саидовал
