[dropcap]М[/dropcap]арт зурул 28-нния апрель зурул 1-ннийн бияннин Орел шагьрулий хьунни Аьрасатнал 53-хъул региондалиясса 1000 спортсмен гьуртту хьусса каратэлул чемпионат.
Шиккува кIицI лаган, 2020 шинал Токиолий хьунтIисса Олимпий тIуркIурдавун цалчинни каратэлул спорт кьамул дурсса. Ва чемпионатрай Дагъусттан Республикалул чулуха гьуртту хьунни СКФО-рал чемпионатрай хьхьичIунсса кIанттурду бувгьусса 8 спортсмен.
Вайннава 7 ия ТIюхчардал «ИППОН» спортклубравун заназисса.
Цалчинсса кIанттурду бувгьунни ХIажиев МахIаммадлул ва АьвдурахIманов Ванатил. Вай кIиягу спортсмен Аьрасатнал цачIун дур командалувух гьуртту хьунтIиссар ноябрь зурул ахирданий хьунтIисса Дунияллул каратэлул первенствалий.
Имара Саидова