ЦIусса каялувчинащалсса хьунабакьаву

Жулва билаятрал ух­ссав­­нийсса Санкт-Пе­тер­­бургливсса вакил ХIасан ХIасанов хьунаавкьунни Санкт-Петербургуллал Миллатирттал къатлул цIусса каялувчи Валерий Николаевлущал.
Цалва ихтилатраву ХI. ХIасановлул кIицI лавгунни Да­гъусттан Республикалул Санкт-Петербургливсса Вакилханалул ва Миллатирттал къатлул дянив­сса арарду ялу-ялун цIакь хъанай душиву, вай махъсса 15 шинал дянив цачIуну цикссагу шадлугъру, батIавуртту дуршиву. БатIаврий хьунни цачIуну гихуннайгу дуллан дакIнийсса давурттаясса ихтилатру.

«Халкьуннал канил пишардал поезд»

Москавуллал метрополитендалий занази бунни Аьрасатнал халкьуннал художествалул пишардан хас бувсса поезд. Му занантIий бур Арбатско-Покровуллал линиялийх дачIи шинал лахъишиврий. Поездрал пассажиртураща бюхъантIиссар Аьрасатнал халкьуннал тарихращал, канил пишардащал, багьу-бизулущал кIул хьун, миннувух – Къизлар шагьрулул ус­ттартурал карунних дурсса авур чIиллащалгу.

Оьрмулул бугьараминнансса бахшишру

Кьурбан-байрандалул хьунийн «Аьрасатнал ни­ттихъул» тIисса суккушиндарал кIанттул отделениялул вакилтал бивунни оьрмулул бугьараминнансса ва инвалидтурансса «Ветеран» цIанилусса Къатлувун-интернатравун. Ва даврил чIарав бацIаву дурссар Дунияллул халкьуннал дянивсса исламрал бизнесрал (МАИБ) ассоциациялул, Каспийск шагьрулул бакIчинал, «Уйташ» ООО-лул ва «Восток» машлул къатлул.
— Кьурбан-байрандалущалгу барча буллай, чIа тIий бура зун цIуллушиву, дакьаву, буллугъшиву. Зуву так чаннасса бакъа пикрирду ва асарду хIасул къашаваннав. ХIакьину куннасса хьунабакьавуртту чIяру даннав зул оьрмулуву, — увкуна «Аьрасатнал ниттихъул» суккушиндарал кIанттул отделениялул хъунмур Таиса МахIаммадовал. Байрандалул савлугъран оьрмулул бугьараминнан бахшишргу дуллунни.

Гьарца ххуллункьини – Нарин-Къалалийн

Августрал 1-нния 15-ннийн бияннин гьарца ххуллункьини Дарбантуллал Нарин-Къалалий, Халкьуннал художествалул пишардал Кьинирдал лагрулий, Дарбантуллал музей-заповедникрал ва Туризм хьхьичIуннай даврил центрданул ка-кумаграйну, дуллантIиссар личIи-личIисса шадлугъру. Миннул лагрулий ва шагьрулул инсантураща ва хъамаллураща бюхъантIиссар хьхьичIавасса шагьрурдавасса цаннил тарихрахух, культуралухух гьан, халкьуннал канил пишардал мастер-классирттавух гьуртту хьун. Шадлугъирттайн­сса билетру бахлай буссар Нарин-Къалалул кассалий.

Азарданущал талай бивкIминнал оьрчIан

Коронавирусрал азарданущал талай, «ятIул зоналий» зий бивкIсса медициналул зузалтрал оьрчIансса Сулакьуллал каньондалийнсса экскурсия хьунни вай гьантрай. Ва аьрххи хьуссар ДР-лул БакIчинал ва ХIукуматрал Информацион политикалул управлениялул сипталийн бувну, Республикалул туризмалул ва художествалул промыслирдал министерствалул чIарав бацIаврийну.|

[dropcap]М[/dropcap]инистерствалул буллусса микроавтобусрайгу щябивкIун, аьр­ххилийн бувксса оьрчIах кIантту-кIанттурдай ялугьлай бия: ирглий къабавцIунма, катердай сайрданий, балугъирттал хозяйствалийн нахIу дукрардайн, минизоопарк ва бигьалагай кIанттурду ххал буван. ОьрчIру бувцунни личIи-личIисса каруселлайн,ба­ссейндалувун бучIан, лагмарасса дуниял чIалачIисса майданная тамаша буван.
Медициналул зузалтрал оьрчIансса ва журалул аьр­ххирду гихунмайгу сакин буллантIиссар.

ХIадур бувссар
Бадрижамал Аьлиевал