Апрель зурул 14-нний ИстIамлив жула цIанихсса балайчи, Дагъусттаннал халкьуннал артист АхIмад АхIмадов гьуртту хьунни «Золотые личности Шёлкового пути» тIисса премия дуллалисса шадлугърай.
ПатIимат Рамазанова
Ва Турциянал билаятрал оьрмулуву хъунисса хьхьичIуннайшивуртту дурсса инсантуран дулайсса, сийлийсса премия дур. Ва премия дулунминнал цIардугу рищайсса дур «Международный центр Стратегических исследований» тIисса комиссиялул. Аьрасатнал ва Турциянал дянивсса дахIаву цIакь дуллалисса «Платформа диалога России и Турции» тIисса идаралий каялувшиву дуллалисса АхIмадлул захIматран лавайсса кьимат бивщуну бур кIицI лавгсса комиссиялул.
Ва ларайсса бахшиш ларсминнавух бур: УзбакIисттаннал президент Шавкьат Мирзиёев, Анкаралийсса Къазахъисттаннал вакил Абзал Ссапарбекулиев, Турциянал Миллатрал Мажлисрал депутат Шамил Айрым, Щаллагу дунияллул элмийсса центрданул директор, элмурдал доктор, профессор Эльчин Искандерзаде, Азирбижаннал телевидениялул хъунама Этибар Бабаев ва цаймигу машгьурсса инсантал.
Вара премия дуллунни Гагаузиянал президент Ирина Влахлунгу, ванин бахшиш дулунгу тапшур бунни АхIмад АхIмадовлуйн.
Жу АхIмадлуйн оьвкуссия ларайсса премия барча дуван. Ванал кIицI лавгунни «Илчи» кказитрал къулагъас цанна мудангу тIааьнну дикIайшиву, буттал миналиясса ссаламрахгу мудан мякьну икIайшиву. -Ттун, гьай-гьай, тIааьнну бия щалла дунияллийх цIа ларгсса инсантуращал ца ххуттай навагу ккавккун, ттуннагу укун бюхттулсса бахшиш дулаву.
Вай гьантрай Турциянал кказитирттал цалчинми лажинтирттай дур му премия ларсминнал суратру. Ттун ттулва миллатралмур къулагъас ляличIинура хьхьичIунссар, нава ххирасса, ттула хIурмат бусса инсантал ххари бансса хаварди тIий ура ва щукрулий ура чил кIанайгу нава лаккучунал, дагъусттанлувнал, аьрасатлувнал цIа адаврай ядуллай ушиву, — тIий ур АхIмад АхIмадов. Ванал увкумуницIун нагу ххи банна: адаврай ядуллай ушивруцIун АхIмад лаккучунал цIа-кьини гьаз дуллай, бюхттул дуллайгу ур.
