[dropcap]М[/dropcap]арт зурул 27-нний Дагъусттаннай лахъа-хъунну кIицI ларгунни Росгвардиялул зузалтрал пишалул байран. Байрандалун хас дурсса шадлугърал мероприятия хьунни Каспийскаллал ОМОН-далул базалий.
Шикку гьуртту хьун бувкIун бия республикалул гужирдал структурардал, МахIачкъалаллал ва Хасавюртуллал администрациярттал, жяматийсса ва жагьилтурал организациярттал вакилтал, дуклаки оьрчIру.
Шадлугърал мажлис тIитIлай, ихтилат бунни ОМОН-лул личIисса бригадалул командир, генерал-майор Сергей Алейниклул.
— КIира ттуршукулия лирчусса чIумул лахъишиврий Ватан дуруччайминнал кьюкьраву ляличIисса кIану бугьлагьиссар национал гвардиялул аьралуннал. Низамрал къаралданий бавцIусса аьралитурал, Дагъусттаннай бакъассагу, Ухссавнил Федерал округрал цайми регионнайгу цала буржру лайкьну биттур буллай, цимилагу ккаккан дурссар цала къучагъшиву, — увкунни ванал.
Хъирив ОМОН-лул ва СОБР-ал аьралитурал ккаккан дунни иш багьний ишла дайсса каруннай бияврил, ярагъ ишла баврил, дайшишру лахъаврил усттаршиву.
Хъунимигу, мюрщимигу махIаттал бунни Гиннесрал мусил луттиравун агьсса Дагъусттаннал гужлув (силач) Оьмар ХIанапиевлул ккаккан бувсса гьунардал. Ванал цаппара метрардай ккарччах ххюрхху бунни бувцIусса микроавтобус, карунних руцан дурунни муххал щинзиртту, кIура дарунни муххал арматура, ккарччах гьаз дурну, экьилирчунни кIусса путру. 
ХIаятраву тIивтIуну бия полевая кухня. Ччиманаща, гъан хьуну, ххал дан бюхълай бия гречкалул ва перловкалул ккурч, чяй, нацIу-кьацIу.
Аьралитурал, БТР-лий щябивтун, хIаятрал лагма буккан бувну, ххари бунни мюрщи оьрчIру. Хъуниминнахьхьун канихьхьун буллунни ярагъ. Росгвардиялул зузалт ва аьралитал барча буллалисса ихтилат бунни мукунма Дагъусттаннал виваллил иширттал министрнал хъиривчу, полициялул хъунама, полковник Дмитрий Гутырял. Махъ лавхъунни къуллугърал бурж биттур буллай жан дуллусса зузалал ниттил Светлана АьбдулхIамидовал, «Элитстройрал» генералийсса директор Шамил МахIмудовлул.
Ихтилатру къуртал хьуну махъ тIиртIунни къуллугърал бурж биттур буллай жанну дуллусса зузалтран дацIан дурсса гьайкал. Дирхьунни тIутIив. Хъирив актовый залдануву хьусса шадлугърал мажлисрай хьхьичIунсса зузалтран ва аьралитуран наградартту дуллунни. Ккаккан дунни Дагъусттаннал эстрадалул машгьурсса балайчитал ва аьрали оркестрданул артистал гьуртту хьусса концерт.
