[dropcap]В[/dropcap]атан дуруччин бюхъаву — му хъанай дур яла чувшиву дурмур ишну. Гьай-гьай, уттинингу цимилгу жула Ватандалий «ххяппа» дизан ччими чансса бивкIун бакъар.
Миннал ахир ссайн дуркссарив тарихрал луттирдал буслай бур. Оьруснал бур му иширан хасъсса хъинну тIайласса учала: «ЖучIана турданущал увкIма турданулугу утантIиссар», — тIисса. Дунияллийсса ишру тачIавгу паракьатну бивкIун бакъар. Дакъар уттисса чIумалгу мукунсса паракьатшиву. ЧIявусса кIанттурдай хIакьинугу дяъвирду найнма бур.
1999-ку шиналгу ми дяъвикартал ххявхссар жула Дагъусттаннайнгу. Га чIумал жула халкь кьянкьану къабавцIуссания, бюхъайссия уттисса Аьрасатнал хIукумат цамур кьяйдалийсса дикIангума.
Га август, сентябрь зурдардий Аьрасатнал аьралий гужирдащал цачIуну Дагъусттан бурувччуссар халкьуннал чулухасса сипталийну гьаз хьусса ополчентурал.
Ккуллал райондалийсса шяраваллаватугу гьуртту хьуссар чIявусса ополчентал га дяъвилий. Ми чумартсса инсантурал дурсса чувшиву чIарах дурккун, хIукуматрал хIисавравун къаларсун дуссия уттинин.
Вана уттигъанну Госдумалул закон кьамул дурунни ополчентурал статус ккаккан дуллалисса. Ккуллал райондалийгу дуллан бивкIунни га дяъвилувух гьуртту хьусса ополчентурал сияхI.
— Шяраваллал администрациярттай бурж бивхьуну буссар, цала-цала шяраваллава га дяъвилувух гьуртту хьусса ополчентурал сияхI хIадур дурну, райондалул администрациялийн диян дуван. Яла гай цачIун дурну, ххал диргьуну, тIайла дуккантIиссар МахIачкъалалив, — куну, бувсуннирайондалул бакIчинал хъиривчу Анатолий Давдиевлул.
