Гьарца инсаннал цала-цала аьламатшиву, ххуйшиву, ххаллилшиву дикIайсса кунна, тIабиаьтравусса уртту-тIутIалгу цалла-цалла исвагьишиву дур.
ТIайланма учинну, исвагьи дакъасса тIабиаьтраву цичIаврагу дакъар. Анжагъ ми жунна, жула хасиятирттаха лахьлахьими дакъа, янилун къадагьайсса ххай ура. Ккаркссарив зун машакулул парх диркIсса тIутIив? Цирдагу ссавнил рангираха лархьхьусса дуссар. Вай, явара, гьарца кIанай укун парх диркIун къадикIай.
Ттун укун парх диркIун ххал шайми машакулул тIутIив дикIай Хъюйннал сунух лавай нанисса жегъир ххуллул чIарах. Ва суннил чIалачIингу вай тIутIал хъиннура дикIай ягин дурну. Ялагу, тIутIал хIайран увну унува, ца иширах къулагъас дангу на чIал хьуну ияв: тIутIай зиярат буллай авцIуну унува, цакуну хьхьичIун ургайхту, янилун багьуна ца чIивисса ццацкIуллул оьрчI. На ганил сурат рищун аппарат буклай унува, урттувух тивунмай лавгун, бакъа хьуна ццацкIуллул оьрчI. Укун караматсса иширттая дайдирхьуна ттул га кьини. Гьай-гьай, хьуна цурдагу тIайлабацIусса.
