ЧIюлу буллантIий бур къатрал лагмахаллу
Вай гьантрай Лакрал райондалул бакIчинал хъиривчу Макьсуд Макьсудов райондалул администрациялул ЖКХ-лул отделданул зузалтращал хьунаавкьунни Гъумукун бухлахисса кIанттай Сурхай-ханнал кIичIиравусса чIявуквартирарду бусса къатраву ялапар хъанахъисса агьалинащал. Микку ххал бивгьунни «Формирование комфортной городской среды» тIисса федерал программалул лагрулий 2021 шинал бакьин бан ккаккан бувсса жяматийсса кIанттурдая.
ДакIнийн бутанну, шикку чIяву квартирарду бусса шанма къатта бувссар 2014-2016 шиннардий «Ветхое жилье» федерал программалул лагрулий.
Администрациялул зузалтрал ххал дурунни бакьин бансса кIанттул тагьар. Агьалинахь бувсунни проектрая, вичIи дирхьунни гайнналми маслихIатирттахгу.
Агьалинал хъин чулий ккарккунни проектру ва кIицI ларгунни цанна ми проектирдаву дан багьлай чIалачIисса дахханашиннарду. Проектрал ялув зузисса комиссиялул вакилтурал чIурчIав дурунни проект дузрайн дуккан дуллай байбивхьукун, агьалинал маслихIатирттах къулагъас дантIишиву.
Ххув хьуминнан бахшишру
Вай гьантрай Лакрал райондалул бакIчи Юсуп МахIаммадовлул бахшишру дуллунни Ватан дуруччултрал кьинилун хас бувсса шеърирдал конкурсрай ххув хьуминнан ва гьуртту хьуминнан. Конкурсрай гьуртту хьуну ия Гъумучиял школалул ряха дуклаки оьрчI: 7-мур классраву дуклакисса Жалаева Зумрут, Шахшаева СалихIат ва 5-мур классраву дуклакисса Аьлишаев МахIаммад, Аьлиев МахIаммад, Алхасов Шамил, Масуева Сабрина. Диплом ва бахшиш дуллунни оьрчIру конкурсрайн хIадур бувсса школалул директорнал тарбиялул даврилсса буллалисса хъиривчу Зугьра Кьурбановал.
Мюхчаншиву дуруччаврил дарсру
Щалагу дунияллул Граждан обороналул кьинилун хасну Лакрал райондалул школарттай дирхьунни оьрмулул мюхчаншиву дуруччаврин хас дурсса дарсру.
Райондалул «ЕДДС» МКУ-лул каялувчи Надир ХIасановлул бувсунни оьрмулун нигьачIисса тагьардаву: цIу ларчIний, пIякь учайсса зат щуркIал хьуний, гужсса марчру бусса, нехру дурксса чIумал цукун къуццу тIун аьркинссарив.
Мукунма бувсунни хьхьиривун, неххавун, щинавун бучIлачIийни мюхчаншиву дуруччаврия.
Надир ХIасановлул кIицI лавгунни ва журалул дарсру дуклаки оьрчIан чара бакъа аьркинну душиву, ми оьрмулул цала тIалав дуллай душиву. Ми дарсирдал кабакьу буллалиссар гьарта-гьарза дан мюхчаншиву дурччавриясса ва апатIрахьхьун иривсса инсаннан цалчинсса кумаг бансса кIулшивуртту.
ХIадур бувссар
Зулайхат Тахакьаевал
