«Жува цачIу» тIисса проектрал лагрулий Аьрасатнал чIявусса шагьрурдай коронавирусрал азарданущал талатисса медиктурал суратру дусса баннерду дацIан дурну дур.

Питердай Дагъусттаннал медициналул университетрал педиатриялул 4-мур курсирай дуклакисса жула лаккучунал, Дюкъуллал шяравасса Салманнул арснал, Гьарун Султановлул сурат ду­сса баннер дур. Жу ванаяту бувсъссия «Илчилул» лавгмур номерданий, «Коронавирусрал махъа- махъма къашайшала хъин уваннин зунтIиссара» тIисса макьалалий.

Ва пасатсса азар жучIарагу сукку хьуния шинай Гьарун Ма­хIачкъалаллал №1 азарханалул реанимациялий зий ур. Гьаруннул суратру МахIачкъалаливсса баннердайгу дуссия, утти Питердайгу дуссар. Шиккува бусан, «Илчилул» сайтрайсса баннерданул хIакъиравусса информация на Фейсбукрайнгу бутайхту, Москавлив яхъа­нахъисса Лайла Крамер тIисса аккаунтрал заллу чичлай бур Москавлив Лениннул цIанийсса проспектрайгу Гьарун Султановлухь барчаллагь тIутIисса баннер ккаркшиву, Да­гъусттаннаясса хIакиннал цIагу, суратгу ххал хьуну, светофорданучIагу бавцIуну, тасса-танингу тамаша бувну бивкIшиву. Ва ххуйсса хавар цинявннангу тIааьн бивзун, «Илчилул» сайтрай кIива гьантлул дянив кIиттуршунниха ливчусса инсантурал бувккуну, ххаришиву аьч дуллалисса комментариярду чичлай бивкIунни. Гьарун Султанов цувама хIакьину ххарину ур цамур иширая: къашайшалт ялу-ялун чан хъанай бушиврия, азарханалий бачIвасса тахру ххи хъанай бушиврия.

— Цукуннугу, коронавирусрал лама лагь хьунни. Агьали уттиния тинмайгу Роспотребнадзорданул тIалавшиндарал кьараллацIун бавкьуну къуццу тIурча, лева-лещантIиссар лама. Му чIумал ххари хъанан бацIанну, — увкунни Гьаруннул, баннердануясса ххаришивугу дурив куну цIуххайхту.

Вагу ванал ххуйми хасиятир­ттаватусса ца дур – ххаллил акъа­шиву. Оьвкуссия на ххаришиву кIидачIин Гьаруннул буттайн Салманнуйнгу. «На рязийну ура ттула арснал агьалинан чара бакъа аьркинсса, бусрав-барчаллагьран лайкь хьунсса пиша язи бугьаврий ва му бюхъу-хIарачатрай зий ушиврий. Гьаруннул ччянива бия хIакин хьунсса хиял, дуккавриву хIарачат бия, кIулшивуртту куртIгу, цIакьгу дуван луттирдах икIайва мудан, практика хьуншиврул, зунгу увххуна. Ттун тIааьнну бия арснан ххуй­сса хIакин хьун ччай бушиву ва ми­ккун хъитгу тIий ушиву. ХIарачатрал хIасиллугу чIалан диркIунни, ччарча азарханалул хъунама хIакиннал, ччарчагу Мединститутрал ректорнал чулухасса барчаллагьран лайкь хьунни, ва, яла-яларив, Гьаруннул реанимациялийсса даврия рязисса бувккунни. Ми цIардал мунаву ххи дуван аьркинссар хIакиннал касму гьарца чулуха дагьайкун лахьхьин­сса гъирарал цIугу», — тIий ур Салман Султанов.