«КIулши дакъашиву»

Уттигъанну ЧIяйннал Культуралул къатраву хьунни жагьилтал наркотикирттая мурахас баврин хас дурсса хьунабакьаву. Жагьилтуращал хьунаакьин увкIун ия ЧIяйннал шяраваллил полициялул участокрал зузала ЯхIияев Назим.
– Наркомания тIисса махъ бур, юнаннал (грекнал) мазрая хIасул хьуну. Мунил мяънагу хъанай дур кIулши дакъашиву тIисса. Наркотикру бур личIи-личIисса журалул. Миннуйн учай героин, кокаин. Бур мукунма ницIайхъувалия ва цаймий ххяххиярттая байссагу. Мунияту жула аькьлу-кIулши даххана дувайсса затру кьацIливун ласлан цукунчIав къабучIиссар. Наркотикру бакъа, на кIицI бавияв мукунма спирт дусса хьюмушиврулгу инсаннал аькьлу-кIулши даххана дайсса душиву. Мигу жагьилтуран ишла дуллан, хIачIлан къабучIиссар. Наркотикру ишла буллали­сса жагьилтурал аькьлу-кIулши зия хъанахъиссар, жинс да­ххана хъанай, цува ци зиссарив къакIулну, авлиясса инсаннайн кIура аллан икIайссар. ЧIара, ккарччив кьатIа тIун дикIайссар. Жагьилну унува къужлуйнгума уккан бюхъай­ссар. Нитти-буттахъахгу ттун учин ччива, чIивисса, хъуна­сса къакуну, зу зула оьрчIал ялув бавцIуну бикIияра куну. Му чIумаллу жува бунияласса нину-ппу хъанахъисса, – куна ихтилатраву полициялул зузалал. Дуллуна ванал цаппара суаллахьхьунсса жавабругу.

«Гъинттулсса калейдоскоп»

ЧIяйннал шяраваллил Культуралул къатрал хьхьичI хьунни шяраваллавасса ва шагьрурдая гъинттулсса каникуллайн бувкIсса оьрчI-душварал дянивсса тяхъашивуртту ва бяст-ччаллу. Вай давуртту дачин дурну бия шяраваллил Культуралул къатрал хъунмур СалихIат Алхасова. Хьунабакьавуртту дайдирхьуна къавтIун бизаврийну. Яла хьуна бяст-ччаллу. Миннувух бия нувщи анаварну марцI баву, ятIул чимус цумур душнил ччяни мюрш байрив, ккунук цуманал ччяни ликкайрив, гьивхьру чIярусса гъагъайрив ва цаймигу бяст-ччаллу.
Хьуна мукунна ссигъри бувчIаву ва викторина. Оьр­чIащал тяхъашивурттайн бувкIсса хъунбавахъулгу рязину бия. Ахирданий бяст-ччаллаву гьуртту хьуминнан, цучIав личIи къаувну, дуллуна бахшишру. БувкIми хъинну рязину ливчIуна.

СалихIат Алхасова, ЧIяйннал Культуралул къатрал хъунмур