[dropcap]М[/dropcap]арт зурул 6-нний, Ккуллал райондалул культуралул къатрал залдануву хьунни, авурсса шадлугъ.
Ва кьини Республикалул дуллалисса давурттал лагрулий, Лакрал райондалия Ккуллал райондалийн бувкIун бия «Культуралул десант». Ва давугу ялун нанисса хъаннил байрандалийн тIайла дацIавугу, хъиннува яргсса ишну хьуна.
[dropcap]Ш[/dropcap]адлугъ тIигу-тIиртIуну нани дурну бия Лакрал райондалул культуралул зузала Шамсият Какваева. Ккуллал райондалул чулухасса махъ лавхъуна администрациялул бакIчинал хъиривчу Александр Маммаевлул.
Цалчин сахIналийн бувккуна Лакрал райондалул халкьуннал инструментирттал «Лакия» ансамбль. Вайннал щаллу дуруна личIи-личIисса лакрал макьаннал къюмай. Буч1ия вайннуйн учин «попурри» кунугу.
Гур дагьан дуллалисса балайрду куна цила Шамсият Какваевал, АьлихIажи Шамхаловлул, ХIасан Сулаймановлул, Мариян Жамалуттиновал ва цайминналгу. Концертравух гьуртту хьуна мукунма Ккуллал райондалулми культуралул зузалтгу. Вайннал ккаккан дуруна Вихьуллал къавтIаву, балайрду куна ХIабибуллагь Кьурбановлул, РайхIанат ХIажиевал ва цайминнал. КIирагу райондалул культуралул зузалтрал бенефист хьуна ва шадлугърая. Циняв ххарину, тяхъану дакIру кIидачIлай бия.
Хьунабакьаврил ахирданий Ккуллал райондалул культуралул зузалтрал каялувчи Марина Ибрагьимовал барчаллагь куна хъамаллурахь: «Район кIира духьурчагу, жува цавай нитти-буттал инсанталлу»,- куна мунил.
