Вай гьантрай ЦIуссалакрал райондалул хъунама ХIажи Айдиев бакIчисса делегация бувкIунни Къиримнал Автономный Республикалийсса Сакский райондалия.

ЦIуссалакрал райондалул делегациялущал архIал аьрххилийн бувкIун бия ДР-лул БакIчинал уполномоченный Аьлибаг Аьлиев, Гумбетовуллал райондалул бакIчи МахIаммадаьли МахIаммадаьлиев, ЦIуссалакрал райондалул Культуралул управлениялул хъунмур ХIабибат Буттаева, ДР-лул Халкьуннал Мажлисрал депутат Зайнуллагь Мирзоев.
Къиримнал аьрщарайсса шадлугъ дайдихьлай, сахIналий кка­ккан дунни «Вежливость месяцев таинства» тIисса Къирим Аьрасатнавух хIала буххаврин хас дурсса видеофильм.
Дагъусттанная бувкIсса хъамал кьамул буллай, миннахь барчаллагь тIутIисса ихтилат бувна Сакский райондалул муниципал образованиялул хъунама, Сакский райондалул советрал председатель Николай Россоловскийл ва администрациялул бакIчи Галина Мирошниченкол.
«Гьашину жу кIилчинсса шинал кIицI лаглай буру жува жулва тарихрал Ватандалийн зана хьусса, цачIун хьусса кьини. Къиримнал агьалинал, АьрасатнацIун цачIун хьуну, тIайласса хIукму бувссар. Вания тихуннай хьунадакьлакьисса цинярда захIматшивуртту жу циняв, уссурвал, ссурвал кунма цачIун хьуну, архIал дух дуллантIиссару. Жу Хъун дяъвилий ххувшаву ларсминнал варисталлу ва мунияту хIадурссару щалва билаятрал, Аьрасатнал, Къиримнал агьалинал махъ бавцIуну, миннал мюхчаншиву, дусшиву дуруччаву мурадрай жаваб дулун», — увкунни Мирошниченкол.
Хъирив махъ буллунни Дагъус­ттаннаясса хъамаллурахьхьун.
Ва ххаллилсса байрандалущал Къиримнал жямат барча бунни ХIажи Айдиевлул.
«КIира шинал хьхьичI жулва тарихраву ххи хьунни Къирим Аьрасатнавух хIала бувхсса кьинилул байран. 2014 шинал март зурул 14-нний чирчуссар Къиримнал агьали АьрасатнацIун цачIун хьусса хъинну хъуннасса агьамшиву дусса кьутIи. Щалвагу Аьра­сат буссия ми агьалинахлу був­ккун, миннал масъала ца чулийн бу­кканнин буруккинттарай ялугьлай. ХIакьину ва жува цачIун був­сса байрангу хъанахъиссар, тарихрал тIайламур бацIан бувсса кьинигур. ЧIирисса чIумул мутталий шикку хьунни тамансса дахханашивур­тту. Къиримнал агьали талихIрайн бувккунни, вихшалдарай бур гихунмайсса паракьатсса оьрмулийн. ДакIнийхтуну барча буллай ура Къиримнал агьали Аьра­сатнавух хIала бувхсса чIирисса юбилейращал. ДакI дарцIуну ура утти вайннал цIусса тарих байбишинтIишиврия», — увкунни ХIажи Айдиевлул.
Сакскаллал агьалинал хьхьичI тяхъасса концертрал программа ккаккан дурна ЦIуссалакрал культуралул управлениялул хъунмур ХIабибат Буттаевал каялувшиндаралусса коллективрал. Мукунна ххаллилсса концерт хIадур дурну дия Сакский райондалул яла хьхьичIунми художествардал коллективирттал.