[dropcap]Ч[/dropcap]Iарав хьхьу-кьини дакъа, ххурхху тIисса Хъуннех. Къатрал лагмагу – дакI дюхлул дуллалисса щюллишиву ва мурхьру. Хъуннеххал тия чулий рахъ бивкIун бавцIусса зунттурду, марцIсса гьава.Вана укунсса, къашайшалал цIуцIаврин дармансса тIабиаьт дуссар Ккуллал шяраваллил азарханалул лагмара. Цир яла къашайшалан хъин хьуншиврул аьркинсса? Гьай-гьай, аьркинссар чIарав хIакин ва цIимилул ссугу.

---

[dropcap]Ч[/dropcap]чянияцIа гьан ччай унува, тIайлабацIу къахъанай, ливчIунав кIа азарханалийн иян. Вана, уттигъанну дакIниймур бартлагансса хIалу дагьунни. Амма дакIниву ца жагьжилшивугу дия, цучIав акъасса, пахъ багьсса азарханавагу ттуйнма бакIрайн къабагьан тIисса.

Азарханалул хIаятравун уххайхту, гива дурккуна ца кIапIал школ оьрчIал цала учительницащал. Га цIана ттул жагьжилшиву дакъа хьуна. Гьай-гьай, на гай оьрчIру ва гайннал учительница Мурачуева ПатIимат бацIан бувну, хъамакъабитулун суратгу рирщуссия. ПатIиматлул бувсуна гай цалчинмур класс­рал оьрчIру бушиву. Цивппагу диспансеризация дуван лавгун бивкIсса.

Ттун кIулссия ва азарханалул хъунама хIакинну ушиву Ссунгъур тIисса инсан, так цува янин ххал къавхьуссия. КIилчинмур зивулийсса медсестрахъал бувсуна ва цалчинмур зивулий ушиву. Гьай-гьай, жул дянив хьуна яла чIиви-хъунсса ихтилат:
— Бувсун ччива, Ссунгъур, виява, вила даврия, азарханалия…
— Ттуйн Абакаров Ссунгъур Ибрагьинхалиллул арс учай­ссар. Ккулатуссара. На 1988-ку шинал къуртал бувссар Да­гъусттаннал мединститут. Ва азарханалий зий ура 1995-ку шиная шинай. Ганиннин цайми кIанттурдайгу зий уссияв. Ванийн: «Кулинская участковая больница» учайссар. Ккуллал шяраву азархана тIивтIуну бур 1950-ку шиннардий.

Га чIумал азархана бивкIун бур утти­сса Ккуллал оьрчIал багъ бусса къатраву. Вай кIира зивулийсса азарханалул къатригу дурну дур мукьцIалунниха лирчусса шиннардил хьхьичI. НукIувамур ва уттимур азарханардал къатригу дурну дур Ккуллал колхозрал цала арцух. ХьхьичIава ши­кку 50 къашайшала уттуишай­сса кIантту бивкIссар. Шиккува байсса бивкIун бур операциярттугу. ОьрчI лаласавугу ши­ккура дайсса диркIссар. ЦIанасса азарханалий дур 10 къашайшала утту­ишин бюхъайсса шартIру. На нава оьрчIал хIакин ура. Бур мукунма шикку бугьараминнал хIакин Кьадинаева Роза Нуру­ттиннул душ. Буссар жучIа мукунма ккарччал хIакин Аминова Аьйшат.

Ва Хъусращатусса бур. Медсестрахъул бур 15. Вай цивппагу цалчинмур ва лахъмур категория ларсъсса бур. Бур жучIа къашайшалал диагноз дишинсса лаборатория. Кардиограммагу шиккура дувару. Гайми – УЗИ, рентген ва цаймигу ишру Ваччавсса азарханалий бувайссар. ОьрчI лаласавугу утти Ваччавсса азарханалий дуллай бур. Шиккува буссар поликлиникагу. Ккуллал шяравасса ччима инсаннаща, шиккун увкIун, цалла цIуллушиву ци даражалий дурив ххал дуван бюхъайссар. Къашайшала шания изан къа­хъанахъисса ухьурча, шаппайнгу лагайссару. ХIасил, цIуцIи машару, хьурча, хъин банну.

Амма ца укунсса затгу ттун кIицI буван ччива. Ва азархана бувну махъ, цаллагу капиталнайсса ремонт дурну дакъар, анжагъ чIавахьултту баххана буварча бакъа. Мунияту райондалул хъуниминнахь тавакъю буван ччива ва иширал ялув хъирив бизияра куну.