Дагъусттаннал Конституциялул Кьини республикалул культуралул хьхьичIунсса ишккаккултрангу дуллунни наградартту. Поэзиялул театрдануву культуралул министр Зарема Буттаевал паччахIлугърал ва министерствалул чулухасса наградартту дуллунни культуралул ва магьирлугърал ишккаккултран.

Министрнал наградарттан лайкь хьуми барча буллай, кIицI лавгунни гьарманал бутIа бушиву «Культура» национал проект бартдигьавриву.

« Республикалий культуралул даву гьаз дуваву мурадрай хъуни –хъунисса давуртту дуллай буссару ва проектрал лагрулий, районнай культуралул учреждениярттал маэшатрал тагьар ххуй дуллай, цIу-цIусса культуралул къатри буллай. Дувару дунияллул халкьуннал лагрулийсса фестивальлу. ТIитIлай буру уттизаманнул журалийсса, ххуйсса яни модельный библиотекартту. Гьашину МахIачкъалалив ва Каспийскалийсса цалчинсса модельный библиотекартту тIитIин дакIний буссару. Ва жагьилтал библиотекарттавун кIункIу бувансса ххуллу-чаранни.

Гьашину национал проектраву гьуртту хъанай буссар оьрчIал магьирлугърал школарттугу, ялунмай гьуртту хьунтIиссар муниципал музейрдугу», – увкунни Зарема Буттаевал. Ванил маслихIат бунни, республикалий коронавирусрацIун дархIусса тагьар къулайсса да­къахьувкун, вакцинартту буван, тамашачитал культуралул мероприятиярттая махIрум къабуваншиврул бурувччуну бикIан. Дагъусттаннал халкьуннал художникнал цIа дуллунни Апанни МахIаммадовлун, Дагъус­ттаннал лайкь хьусса артистнал цIа дуллунни Къумукьнал театрданул режиссернан Заур Аьлиев­лун.

Дагъусттаннал культуралул лайкь хьусса зузалал цIарду дуллунни Табасараннал театрданул артист Аьлимурад Аьлимурадовлун, «Гюнеш» хореографиялул школалул директорнан ва цаймигу хьхьичIунсса зузалтран. Дагъусттаннал хъунаманал цIаниятусса каний дахIай ссят дуллунни Дагъусттаннал паччахIлугърал филармониялул «ETHNO BAND» ансамбльданул каялувчи Рашид Бекеровлун.