Гъинттулсса каникуллай чIявусса студентътал ва институтирттаву дарсру дихьлахьисса муаьллимтал бучIай шяравун биян, бигьалаган.Ца мукунсса хьунабакьаву хьунни Ккуллал шяраваллил библиотекалийгу.
Хьунабакьаврийн бувкIун бия Дагъусттаннал педагогикалул университетрал студентътал ва муаьллим Нарисат Узунова.
Нарисатлул цила ихтилатраву бувсуна студентътурал ва институтрал багьу-бизулияту. Ванихьхьун буллалисса суаллавух бия: «Зачет дишин, экзамен дулун арцугу харж дан багьайссарив?» тIисса суалгу. Му суалданухьхьун жаваб дуллай, ванил куна: «Арцу кIулшиву ласаврил ххуллий цукунчIав хIалану дикIан къабучIиссар. Мукун ларсъсса кIулшивугу кIулшиву дакъар», — куну. Студент душ Кьубатаевал бувсуна цуппа ккалай бушиву востоковедениялул факультетрай, микку китайнал ва аьрабнал мазру лахьлай бушиву.
Педагогикалул университетрал студентътал бакъагу, бувкIун бия ялагу Б. Мурадовал цIанийсса Культуралул ва искусствалул колледжраву ккалаккисса Гучаева, Шяраваллил хозяйствалул институтраву ккалаккисса Аскандарова ва цаймигу. Вайнналгу бувсуна цала-цала дуккаврияту.
Библиотекалул зузалтралгу студентътуран тIайлабацIу чIа увкуна, луттирдащалсса дусшиву тачIаврагу чан хьун мадитару увкуна. Узунова Нарисатлул бавтIми кIул бувна цила И. АпанниевлуцIун цачIуну итабавкьусса «Словарь арабских и персидских лексических заимствований в лакском языке» тIисса луттиращал. Лу пишкашгу бувна библиотекалун.
Аьйша ХIажиева,
Ккуллал шяраваллил
библиотекалул каялувчи
