ЦIуссалакрал райондалийсса ТIюхчардал 1-мур школалий хьунни 1999 шиналсса дяъвилул иширттаву къучагъшиврий жан дуллусса полициялул лейтенант АхIмад Давдиев увсса кьинилун хас дурсса шадлугърал линейка.
Андриана Аьбдуллаева
ДакIнийн бутан, та 5-мур сентярьданул кьини, АхIмад цала къуллугърал уртакьтуращал ТIюхчардал блокпострай ивкIуссар. ТIюхчардал шяравалу боевиктурал вив ларсун махъ АхIмад хIаласса милицалтрал чIирисса кьюкьлунгу ярагъуннил балгусса азарахъул боевиктурайн данди бацIан багьссар.
Шяраваллил ялув махIлалия биту-ххитурдал чIурду баллай, кIийн левчусса АхIмад боевиктурал кьюкьлуйн тIайла авцIуну ивкIссар.
-Ина бусурманчу ура, ярагъгу щяв бивхьуну, канийн учIарча, жу вин цичIав къабанну», — тIисса террористурахь ванал увкуссар: «ХIаписартал канийн къабучIайссар», — куну. РухI дукканнин, ярагъ канища хIура къабувну, талайгу ивкIссар. Ванан тани диркIссар 31 шин.
Аьпалул хьуну махъ АхIмад Давдиевлун Къучагъшиврул орден дуллуссар. ТIюхчардал школалунгу, дружиналунгу ванал цIа дирзссар.
АхIмадлун хас бувсса мажлисрай гьуртту хьун бувкIун бия «Аьрасатнал ниттихъул» тIисса Щалагу Аьрасатнал жяматийсса суккушиндарал региондалул отделениялул председатель Таиса МахIаммадова, Каспийскаллал краеведениялул музейрал директор Нажмуттин ХIажикьурбанов, АхIмадлул уссу Сайпуттин, гъан-маччами.
Цала ихтилатирттаву вайннал бувсуна Давдиевхъал кулпатрая, АхIмадлуя ва АхIмад кунмасса низамрал зузалтрал къучагъшивурттая.
Ихтилатру къуртал хьуну махъ Сайпуттин Давдиевлул барчаллагь увкуна школалул директор Шайх-АхIмад Дадаевлухь ва учительтурал коллективрахь. Мюрщи давдиевцынал ккаккан бунни «Жуна дакIний уссаксса сагъну уссар» тIисса композиция. Итабавкьунни гьаваллавун 51 кIяласса шар. Вайксса шинну хьунтIиссия АхIмадлун май зурул 11-нний.
