[dropcap]В[/dropcap]ай гьантрай ГьунчIу­кьатI­рал шяравасса ХIу­сайннул арс Дандамаев ХIасан­нун хъанай дур 85 шин. 1953-ку шинал, цалла шяраву арулшинал школагу къуртал бувну, дуклан лавгун ур Гъумукун.

Школа къуртал бувния махъ зий ивкIун ур колхозраву. Муния махъ дуклан увххун ур Москавуллал Мелиоратив институтравун. Мугу къуртал бувну зий ивкIун ур Даггражданстройрал шамилчинмур филиалданий хъунама механикну. 1966-ку шинал ва ивзун ур Къаза­хъисттаннайн.

Ванан ХIасан тIисса цIагу дирзун дур буттал,1921-ку шинал къачагътурая буттал шяравалу дуручлай, 15 шинаву виричуну ивкIусса комсомолец ХIасаннул цIа дуну тIий .

ХIасаннул ппу ХIусайнгу 1942-ку шинал дяъвилийн лавгссар, Ккав­кказнаву фашистуращал талай ивкIуссар. Му цувагу хIаписар ивкIссар. ХIасаннул ниттил Нажаватлул цилалу оьрчIру ччаннай бацIан бувссар. Ванил кIиягу арс, институтругу був­ккуну, ххуйсса къуллугъирттай зий уссия. ХIасаннул хъунама арс хьхьирил аьралуннал цалчинмур ранграл капитан хьуну ур. КIилчинма арсгу, институтгу бувккуну, Актау шагьрулий цала кулпатращал зий ур. Цува ХIасан, кулпатгу, душругу бувцуну, МахIачкъалалив зана хьуссар.
Ва хъанай ур захIматрал ветеран ва навтлил промышленностьрал министерствалул отличник. Ванан буттал шяравалу хъинну ххирар. Му савав хьухьунссия буттал миналийн зана хьунгу.
Ххирасса ХIасан, жу, цинявппагу вил гьалмахтал, дустал, гъан-маччами барча дуллай буру, ина ниттил увсса кьинилул шадлугъ.ЧIатIий буру вингу, вил ичIуваминнангу цIуллушиву, оьр­мулуву талихI ва тирхханну. Ина вила бусса оьрмулий бусравну, оьрчIал оьрчIал ххари уллай, оьрмулул уччиннин итаннав! Ина хIалал бувссар чIявуссаннал хIурмат.
ГьунчIукьатIрал ккуран,
дустал, уртакьтал