Щалагу Аьрасатнал субботникрай чялишсса гьурттушинна дунни Хъусращиял школалул дуклаки оьрчIал ва учительтуралгу.
ЧчюрклицIа марцI бунни школалул лагма-ялттусса кIанттурду. ХIадур бувну бия мурхьру бугьансса кIантту.
З. Тахакьаева
АлхIаткьини мюрщими классирттай каялувшиву дуллалисса учительницахъул – Марзижат Рамазанова, Лида АхIмадова, Сагъират Аминова ва пионервожатая Аьйшат Рамазанова оьрчIащал бувкIун бия дяъвилия зана къавхьуминнан дацIан дурсса гьайкалданул лагма-ялттусса кIанттурду марцI бан.
Субботникрай гьуртту хьунни «Справедливая Россия» партиялул кIанттул отделениялул хъунама МахIаммад Валиев. МахIаммад ччя-ччяни учIайссар буттал шяравун, школалунсса, дуклаки оьрчIансса ссайгъатирттащал. Махъсса шиннардий лув-ялув Ххувшаврил байрандалул хьунийн сакин дунни дяъвилия зана къавхьуминнал гьайкалданул лагма-ялттусса кIантту марцI бан буккавансса субботникру.
Ва базилухгу байбихьулул классирттал оьрчIру, партиялул цIа чирчусса хъахъи хьхьичIухдахIултраягу ххарину, гъирарай зий бия субботникрай. Ахирданий МахIаммадлул мукьвагу классран пишкаш бунни ттупру.