Цахъис бухьурчагу дунияллий хъанахъимур няраву балглагинан чIалачIисса затну бур, баргълагавал чуллайсса къачансса хIукуматру «Жу зуйн къакъаршиссару» тIурчагу, дуллалимуних бурувгсса чIумал,Аьра­сатнал чулийнмайсса ябитаву щаллара дусшиврийсса дакъашиву. ХIакьину дунияллул хъунмур политикалул аралуву къапаракьатсса тагьар хIасул хъанайнна дур.

ХIажимурад ХIусайнов
Жунма тачIав дакIния бу­ккан битан къабучIиссар, ялун нанисса никирахь чIун-чIумуй буслан аьркинссару, дурагу 75 шинал хьхьичI хъинну оьттух хьусса душман ух увну, жула буттахъал жунма тархъансса оьрму бахшиш бувшиву. Дурар уттигу гайннал ттаркIру лу­ххайн дуккан, аьрщаравух хIала хьун. РухIру тIурча, муданнагу зана дикIлайнна дикIайссар тIар цала ужагъирттайн. Муниятур жула ниттихъал хамис­кьини кьунниялай кIюлаччатI бувну, личIурду, ягу цамур нахIу-нацIу, чIахху-чIарахнайх дачIайсса диркIсса.

Жува, зунттаву яхъана­хъи­сса инсантал, аьркинссару жула уссу-ссурвавращалсса, чIаххувращалсса, шяраваллал жяматирттащалсса, миллатир­ттащалсса дахIаву цIакь дуллан. Му чIумал цIакь хъанахъиссар Дагъусттаннал республикагу, Аьрасатнал хIукуматгу. Яхъанахъавриву, бухху-буккулуву, инсантуращалсса дахIавурттаву дакI тIайлану къуццу тIутIаву – му ца яла хьхьичIунмур ххуйшивур. Му чIумал, цукун­сса макрурду жула лагма щашларчагу, ми тачIав бакIуйн къабуккантIиссар!