БАДАВИНАЛ АРС МУРАДОВ СУЛАЙМАН
Оьрмулул 82 шинаву аьпалухьхьун лавгунни ГьунчIукьатIрал шяравасса ХIажимурадхъал Бадавинал арс Мурадов Сулайман.
Увну ур Сулайман 1940-ку шинал ГьунчIукьатIрал шяраву. Буттал шяраву школагу бувккуну, гихунайгу дуклан увххун, къуртал бувну бур Дагъусттаннал шяраваллил хозяйствалул институтрал агрономтал шайсса факультет. Ватандалул хьхьичIсса цалва буржгу лавхъун, кулпатгу бувну, зий, захIмат буллай ивкIссар агроном-виноградарну ГьунчIукьатIрал къутандалий.
Сулайман ахиратрал шаврил къумашивугу кIидачIлай, жижара буллай буру кулпатрахь, арсурваврахь, уссурссуннахь ва махъсса цинявппагу гъан-маччанахь. Сулайманнул бунагьирттал аьпа баннав, рухI паракьатний дишиннав, гьав нурданул дуцIиннав.
ГьунчIукьатIрал жямат
Зубайрдул душ Аьлиева Асли
Цаппара хIаллай къашавайгу бивкIун, оьрмулул 81 шинаву аьпалухьхьун лавгунни Карашрал шяраватусса Зубайрдул душ Аьлиева Асли.
Асли бувну бур 1941-кусса шинал Лаккуй Карашрал шяраву. Байбихьулул школа бувккуну мукьах зий, захIмат буллай бивкIун бур К. Маркслул цIанийсса колхозраву. Щар хьуну мукьахсса ванил сайки щалва оьрму лавгун бур Карашрал къутандалий, мура колхозрал личIи-личIисса давурттай зий. ХIалал бувну бур хIурмат ва чIявусса барчаллагьру.
Асли бия цила ичIувагу, агьлу-авладрал ва щалагу жяматрал дянивгу бусравшиву ххисса, хIал бавкьусса инсан, ас-намусрал бувччусса зунттал хъамитайпа.
Асли аьпалухьхьун лагаврил пашманшивугу кIидачIлай, дакIнихтунусса жижара буллай буру ванил арсурваврахь ТIагьирдухь, Шамсуттиннухь, Аьбдуллахь, душваврахь Аьишатлухь, Раисахь, Аксанахь ва махъсса цинявппагу гъан-маччаминнахь. Цил бунагьирттал аьпа баннав, имандалий лавгун лякъиннав.
Карашрал жямат
ГьунчIукьатIралгу, лакралгу патриот Аминнул арс Загьидинал ттун баян бунни цала ппу личIи хьушиву. Я Аллагь, цал бунагьирттал аьпа баннав, гьав нурданул дуцIиннав, пирдавс алжан нясив баннав, махънай барачат бишиннав.
На гьунчIукьатIиричу акъара, гьухъаличу ура, амма Аминнул бувсса захIмат, дурсса давуртту ччинаща дан къашайссар. Му ия цила икIайкунсса патриот цала шяраваллилгу, Лакку билаятралгу, щалагу Дагъусттанналгу. Кьура шинал мутталий «Илчи» кказитрай (подпискалул отделданий) зузиссаксса хIаллай, балики, нажагь цумур-бунугу номер къабучIарча, Аминнуйн хавар байссия. Аьпабивул, му гьан къабувну къабитайва, мунан кIула гъурбатрайсса инсан мякьну ушиву «Илчилух».
Ттуна янин ккавккун акъанугу, ца уссу куна чIалан икIайва. Къашавайшиву баяйхту, нюжмардий цал оьвчайссия, хъинну ххари шайва, аьпабиву.
Ци банссар, чичрулун цичIав бан къашайхха. Жула хьурдай учинсса инсан ия, мунал духIин, мяърипат эбратрансса дия щалагу жяматран, агьлу-авладран. Мунал ттун ссайгъатран бувкIуна цува авторсса кIива лу, мугу дакъарив дугъришиву.
Амин кунмасса инсантал, ГьунчIукьатIран бакъа, щалагу жула ватандалун чан къабаннав, му акъашиву жунма кIул къахьуншиврул. Амин!
МахIаммад-ХIажи Ханов,
ш. Ростов-на-Дону
Мяммал душ АхIмадова Мариян
Оьрмулул 70 шинаву аьпалувух бивхьунни Хъювхъиял шяравасса ххаллилсса зунттал хъамитайпа АхIмадова Мариян.
Хъинну иминсса, салихIсса хасиятрал заллу, лагманащал хIал бавкьусса, пиш тIий бакъа зума къабахъайсса инсан бия Мариян.
Мариян бувну бур 1952-ку шинал Хъювхъиял шяраву Мяммал ва ПатIул кулпатраву. Буттал шяраву мяйра шинал школа къуртал бувну махъ дуклан бувххун бур Буйнакскаллал педучилищалувун.
1970-ку шинал ласнащал архIал лавгун бур Дубки посёлокрайн, ЧиркейГЭСстройрайн. Стройка къуртал хьуннин зий бивкIссар микку, Комсомолтурал ва жагьилтурал бригадалуву штукатур-малярну. ЧIярусса бахшишру, грамотартту ларсъссар ванил шикку зузиссаксса хIаллай, «Зунттал хъами» журналданий, «Дагестанская правда» кказитрай цимилгу чивчуссия та чIумал Марияннуя. Ванил сурат мудангу лархъун диркIссар ХIурматрал улттуй.
Муния махъ Мариян лавгун бивкIссар ласнащал Иракьнавун, мукунма тиккусса ГЭСстройрай зун, тихгу дурссар шанна шин ва дачIи. Тиха бувкIун махъ Мариян пенсиялийн букканнин зий буссия Дубки посёлокрай гостиницалул администраторну.
Мариян бикIайва цила буттал кIанугу, буттал щаргу, щарнил жяматгу ххирасса инсан.
Марияннул, ласнащал архIал хъунигу бувну, дуккингу бувну, халкьуннавун буккан бувссар 4 душгу, 1 оьрчIгу.
ЧIун къадирну аьпалувух бивхьусса Марияннул бивкIулул кьурчIишиву кIидачIлай, жижара буллай буру ванил арснахь Рамазаннухь, душварахь Хамисатлухь, Ххадижатлухь, Написатлухь, Зугьрахь, уссурваврахь Исяхь, КьурбанмахIаммадлухь, Шихамирдухь, ссурваврахь Суадатлухь, Асиятлухь, ПатIиматлухь ва махъсса гъан-маччаминнахь. Бунагьирттал аьпа баннав цил, алжаннул ххари баннав, барачат махъну ливчIун лякъиннав.
Хъювхъиял жямат
