АХIМАДИЛ АРС
МУСАЕВ ИОСИФ
Декабрьданул 3-нний, къашавай лахъигу къалавгун, аьпалухьхьун лавгунни Кьукуннал шяравасса АхIмадил арс Мусаев Иосиф.
Иосиф увну ур сентябрьданул 1-нний 1937-ку шинал Мусаев АхIмадил ва Наватлул кулпатраву.
1954-ку шинал Гъумучиял дянивмур даражалул школагу къуртал бувну, увххун ур Дагъусттаннал шяраваллил хозяйствалул институтравун. Вагу къуртал бувну, 1960-1963-ку шиннардий, зий ивкIун ур Лакрал райондалул «Правда» колхозрал агрономну, яла – Гъумучиял дянивмур даражалул школалий. 1967-ку шинал ва кьамул увну ур Дагъусттаннал Промышленностьрал элмийсса хъиривлаявурттал институтравун. Микку зий унува, 1973-ку шинал ххаллилну дурурччуну дур биологиялул элмурдал кандидатнал диссертация.
1977-1978-ку шиннардий Иосиф зий уссия Дагъусттаннал обкомрал инструкторну, 1983-2014-ку шиннардий, пенсиялийн укканнин, зий уссия Дагъусттаннал Шяраваллил хозяйствалул академиялуву доцентну.
Иосифлул 150-нния лирчусса биологиялул элмийсса давуртту рирщуссар личIи-личIисса журналлай, ляхъан дурсса давурттан буллуссар хIукуматрал 20 патент ва ми хIакьинугу ишла буллай буссар Дагъусттаннай ва мунил кьатIув ахъулссаннул ва къюмайтIутIул багъирдаха зузиминнал.
Иосиф уссия хIал бавкьусса, дакI-аьмал хъинсса, гьарца дан-дитанмунил чулухунай итххявхсса, хъярч-махсара ххирасса, гьарцаннащал авкьусса инсан. Пикрирдай икIайссия шин ва дачIиннул хьхьичI аьпалухьхьун лавгсса цала чIивима уссу Сулайманнул.
Иосифлул, цала кулпат Зинащал, хъуни бувссар шанма ххаллилсса душ.
Иосиф жуятува личIи шаврил кьурчIишивугу кIидачIлай, жижара буллай буру кулпат Зинахь, душваврахь – Сапиятлухь, Мааьзатлухь, Асиятлухь, ссу Жариятлухь, уссил ва ссил оьрчIахь ва махъсса цинявппагу гъан-маччанахь. Махънал оьрмурдай барачат бишиннав, кьурчIишиву лагь дансса ххаришивуртту ялун дияннав! Иосифлул бунагьирттал аьпа баннав, алжаннул ххари аннав!
Кьукуннал жямат
Жул бургъил нур
Шинал хьхьичI чил аскисса ка сававну аьпалул хьусса ссил Шавкьатлул дард жул дакIурдиву тачIаврагу хьхьара къахьунссар, хъиннура хъунна хъанарча дакъа.
Ттул аьзизсса ссувай, ттул янил чаний, ттул бургъил нур, ина бакъашиву, вил чани-парсса симан ххишала ххал къахьунтIишиву захIматну бур лялиян буван, вицIа хьуну бушиврийн вих хьун хъанай бакъар.
Вил бивкIулул жу циняв, вил ххуйшиврул ва хъиншиврул асар бияйцири, бакIру хьхьичIун дичин бунну, гъав лаган бунни жул ужагъру.
Чурх кIукIлуний, рухI чаннаний дирхьуну лякъиннав, вил рухIиран кIу бизансса цичIав жуща хьуну къалякъиннав.
Ссу Асват
Ттулагу, ттула творчествалул уртакьтуралгу цIанияту хъуннасса кьурчIишиву кIидачIлай буру Лакрал театрданул директор МахIаммадлухь, ванал аьзизсса ппу
ХIусайн Камалович
аьпалухьхьун лагаврийн бувну. Махънал оьрмурдай барачат бишиннав, гьав нурданул дуцIиннав.
Бахттун Гъазиева
Ширванинал душ Жалалова ХIабибат
ЗахIматсса азардануща ххассал къавхьуну, оьрмулул 57 шинаву личIи хьунни жуятува дакI хъинсса инсан, нахIу-хIалимсса хасиятрал заллу, ласнан хIурмат бусса кулпат, кулпатран аьзизсса нину, дуклаки оьрчIан ххирасса учительница, ЧIяйннал жяматрал дянив бусравсса инсан Жалалова ХIабибат Ширванинал душ.
Бувну бур ХIабибат ЧIяйннал шяраву 1965-ку шинал. ЧIяйннал дянивмур даражалул школагу къуртал бувну, бутта акъасса хъунмасса къушлива, ХIабибат цинма цуппалу лавгун бур Ростов шагьрулийн дуклан буххан, дуккаврихсса мякьлил бувцухьунссия. Тикку дуклакисса ппурттуву университетрал ректоратрал цIания бувкIссар ЧIяйннал школалийн, хасну химиялул дарс дишайсса учитель Эфенди Амировичлуйн, барчаллагьрал чагъар, ХIабибатлун укун цIакьсса элмулул гьанурду бизаврихлу барчаллагь тIутIисса. Университет ХIабибатлул къурталгу бувссар ЯтIул дипломрай, ва тиккува студентътурахь дарс дихьлан тавакъю буллай бивкIссар. Амма, ниттил тавакъюрайн бувну, зана хьуссар буттал шяравун.
1997-ку шиная шийнмай ХIабибат зун байбивхьуссар ЧIяйннал школалий. Цуппа школалий зузиссаксса шиннардий ХIабибат Ширваниевнаща бювхъуна дуклаки оьрчIан элму лавайсса даражалий лахьхьин дан. ХIабибатлул усттарсса кIулшивуртту дулаврийну цикссагу выпускниктал дуклан бувхссар хьхьичIунсса вузирдавун. ЧIярусса шиннардий дакIнийхтуну бивхьусса захIматрахлу, школалул 100 шинал юбилейрай, ХIабибатлун дуллуссар «Дагъусттан Республикалул лайкь хьусса учитель» тIисса бусравсса цIа.
ХIабибат хар-хавар бакъа къашай хьувкун, учительтурал коллектив ва дуклаки оьрчIру хъунмасса умудрай буссия ххирасса учительница, хъингу хьуну, зана хьунссар тIий. Къабартлавгунни умуд, батIул хьунни жуятува ххаллилсса педагог ва инсан.
ДакIнийхтуну хъуннасса кьурчIишивугу кIидачIлай, жижара буллай буру ХIабибатлул ласнахь Жалаллухь, душнихь Беллахь, оьрчIахь Кьурбаннухь ва Исламлухь, уссурваврахь, ссихь, цинявппагу мачча-гъанцириннахь.
Имандалий лавгун лякъиннав, махъминнал оьрмурду лахъи баннав, гьав нурданун лахъаннав!
ЧIяйннал школалул
учительтурал ва дуклаки оьрчIал коллектив
