[dropcap]У[/dropcap]ттигъанну МахIачкъала шагьрулул 22-мур лицейрал 6-мур «м» классрал дуклаки оьрчIру ва учительтал хьунабавкьунни Хъун дяъвилул гьурттучи, Хъусращиял шяравасса, оьрмулул 97 шинавусса, ХIусайнаев Сяид ХIусайнал арснащал.

Бадрижамал Аьлиева
Хьунабакьаврин хасну хIадур бувну бия класс: доскалийн лархъун дия дяъвилиясса ххаругу бусса суратру, столданий, лавхъсса майлул чирахъирттал вив лавсун бия тай шиннардий талатаврил майданная шаппайн гьан буллай бивкIсса чагъардануха лащан бувсса конверт.
Уттинин телевизорданул экранная цанма та дяъвилия цимилгу бавнугу, дуклаки оьрчIавасса чIявуминнан ва цалчинсса бахтти бия, оьхIалсса дяъвилул иширттавух гьуртту хьуну, цала хьхьичI щяивкIсса ветераннах вичIи дишинсса, мунахьхьун суаллу булунсса.

ХIусайнаев Сяид 1942 шинал хушрай лавгун ур дяъвилийн, къуллугъ буллай ивкIун ур пехоталуву. Пулеметчик Сяид гьур­тту хьуну ур Чачаннаву, Ингушнаву, Украиннай, Молдавиянаву ва цаймигу кIанттурдайсса талатавурттавух. 1944-ку шинал ванайн кIусса щаву дирну дур. Зана хьуну ур шавай орденнал ва медаллал хъазамгу бувцIуну.
Сяидлун чIивинияцIа ххирасса бур музыка, балайрду, хIатта дяъвилийгума цанма ххирасса каманча канища бувкьун бакъар, сант дагьний, цала аьра­ли дустурал дакIру дуван­сса номерду ккаккан буллай. Ва кьинигу ванал щаллу бувна дяъвилиясса лакку мазрай­сса балай, цайми миллатирттал оьрчIан бувчIиншиврул, балайлул мяъна-мурадгу бувсун.

ОьрчIал ветераннахьхьун буллалисса суаллу бия личIи-личIисса, миннувасса цагу бия цIанасса жагьилтураясса. Ветераннал жавабран бувсунни цанма цIанасса жагьилтал хъинну дурккусса, захIмат ххирасса, цIу-цIусса кIулшивурттал хъирив багьсса ччай бушиву.