ХIакьину Лакрал район илданул итталу дур

Жулла Лакрал райондалун ларгсса шин цукунсса дия чирча, ттул пикрилий, сивсуну учин бучIир бахтти бусса, дакIний личIансса, чIалансса ккаккиярттащалсса дия куну. Укун учинсса хIуччардугу чан­сса бакъар.

Райондалул сий, даража гьаз бан мудангу чялиш увксса, чату цукунсса каши шайрив ххал дуллай, хъирив излазисса ур райондалул бакIчи Юсуп МахIаммадов. Ванаха лавхьхьуну хIарачат буллали­сса бур ванал чIарахми ва лагма-ялттумигу.
Юсуп МахIаммадов райондалий каялувшиву дуллай айивхьуния мукьах зунттал районнал социал иширттал ва маэшатрал давриву Лакрал райондалул цимирагу шинал бувгьунни 1-ми ва 2-ми кIанттурду. Ялунма чIалай бур райондалул бакIчинал биялагу хъунма хъанай, чIарав бацIлацIимигу гьарза хъанай, махъгу бацIлай бушиву. ЧIалай бур, агьалинал мюхтажшивурттугу лаларсун, диял­сса къула­гъас райондалух дуллай бушиву.

Райондалул оьрмулуву хъунмасса асар биянсса ишну хьунни, цайми районнаяр хьхьичI, Дагъусттан Республикалул ХIу­куматрал председатель Артем Здунов бакIчисса делегация 2019-ку шинал райондалийн бучIаву. Хасну му аьрххи сававну дузрайн дуклай сукку хьунни чIярусса, дарцIуну диркIсса, строительствалул давуртту ва цайми-цаймигу агьамсса ма­съалартту.
Республикалий дачин дур­сса царагу программалувух Лак­рал район гьуртту къархьуну къалирчIунни. Мукун, «Единая Россия» партиялул сипталий дуллалисса «Комфортная городская среда» тIисса ва агьалинал сипталий дачин дурсса программарттайн бувну дурсса давур­ттал Гъази-Гъумучиял чIалачIин ххуй чулий даххана дунни, агьалинал багьу-бизу къулай хьун­сса шартIру хьунни.
ЦIинцIлил, ччюрклил бувгьуну, шяраваллил гьайбат зия дуллай бивкIсса кIанттуя хьунни я бацIансса «Жагьилтурал парк». Цамур даражалийн лавхъунни Гъумукухсса Хъунххуллу. Гъумуксса паркраву бувсса футболлай буккай майданнив хIатта чирахъирттал чаннай ттуплий буклакисса оьрчIал чIурду чан къашай.
Ххуйсса бущилий най дур Гьухъаливсса Хан-Мюртазялил гьайкал дакьин даврил, мува кIанттай Хъункъапу (арка) бацIан баврил давуртту.
Къаккавкма вих ангума захIматну бикIай, ШавкIуллал шяраваллил чуллахух нанисса кIирагу неххайх, инсан хIайран ансса, загълунсса, уттинин Ккавкказнаву къабувсса даражалул ламурду, ШавкIрату Щарав асфальт бувтIусса, чирахъирттал чанна лахъан був­сса ххуллу буллай бур учайхту. Укун харжлугъ хъуннасса строительстварду зунттал райондалий дуллалаву – алши шавур. Мукунма ххаллил­сса ххуллу хьунни Ххюлуссуннал шяравун бияннингу. ЦIубуккан бунни ШавкIрату ГьувкIравсса ххуллу. ЦIусса ФАП-ру бунни Ххюлу­смав ва Кьубав. Гьашинугу шанма ФАП бан ккаккан бувну бур райондалий.
Зунттал кIанттайсса щинал мюхтажшин хIисавравун ларсун гьашину зун тIий бур «ТтурчIайнна-Зунтту» – «КIямаши-ГьунчIукьатIи-Гьухъал» тIисса щин дуцавриха. Мукунна щин дуцинтIий бур Къурлату Лахъирив, Ттурцив, Хъунав ва Хъурхъияту Щарав.
2018-ку шинаву цIу буккан бувхьурча Щардал ва Хьур­ттал школартту, 2019 шинал цIу бувссар Ккурккуллал ва ЧIурттащиял школартту. Гьашинугу хIадур хъанай бур цайми школарттахагу зун.
Лаккуй ялапар хъанахъи­сса жяматирттан бакъассагу, шийн бучIайминнан, бучIан ччиминнан ххаришиву дагьан­сса, чIярусса шиннардий хьурдай тIий бивкIсса тIабиаьтрал газ буцаву биттур хъанай душиврул хаваргу малхIан кунма бур жула дакIурдин.
2019 шинаву райондалий хьусса яла агьамсса иширан ккалли бан бучIир, жула билаятрал гьарца мурцIниятусса хъамалгу бувкIун, район сакин хьуну 90 шин шаврил шадлугъ бюхттулсса даражалий шаву. Мунил хъиннура гьаз дунни райондалул сий – республикалийгу, мунил кьатIувгу.
Гьалбатта, ца макьалалий, мюрш бивкIун, цимурцаннуя бусан къашай. Амма райондалул агьалинал ахIвал, багьу-бизу ххуй баву мурадрайсса, цал архIал дачин дурсса вайксса давуртту Лаккуй тачIаврагу хьуну диркIшиву къакIулли.
ТIутIайх бичиннав Лакку улча. Кабакьиннав цинявннацIун!
М. Мусалаев,
«Ххяххабаргъ»
кказитрал хъунама редактор