[dropcap]Ш[/dropcap]колалий дуклаки шинну цинявннан ца яла яргми ва аннами асарду кьабитайсса шинну духьунссар.

Оьрмугу лавгун,  жуятувагу цакьнива бава-ттаттахъул хьунугу, школалия ва жула хIурмат лавайсса учительтурая ихтилат багьни,  мюрщи оьрчIайнгу бувккун, дакIругу кIукIлу ларгун личIару жува, хъювсулгума буккару. Шинну яла наниссаксса цаннах ца мякь буккаврил мукунсса журалул хьунабакьавурттаясса ххаришивугу, оьрчIнийра кунна, пайханмарсса дикIай. ЦIа ларгсса ЧIяйннал школа къуртал бувну 20 шин ларгун махъ цалчинсса хьунабакьаву кIицI ларгсса 1988 шиная шиннайсса аьдатрайн бувну, вай гьантрай хьунабавкьунни 52 шинал хьхьичI школа къуртал був­сса, 1968 шиналсса выпуск.

---

Залму АьбдурахIманова
Га шинал, школагу къуртал бувну, цала-цала оьрмулул ххуллурдайх  лавгун ур кIи­ва классрал 54 выпускник. Вай дуклай бивкIсса классирттал каялувчиталнугу бивкIун бур, аьпа бивухъул, гьунар бусса учительтал, Хъун дяъвилул ветеран Аьбдуллаев Сулайман Аьбдуллагьлул арс ва ХIажиев Сулайман ХIажинал арс. ЧIяйннал школа хъунмасса тарих бу­сса, хьхьичIунсса пишакартал хIадур бувсса, ца Ккуллал райондалия бакъагу, чIаххуврайсса районнал цайми миллатир­ттал оьрчI-душваврангу ххуй­сса кIулшивуртту дуллусса машгьурсса школа бур. Шичча бувкссар цIа дурксса аьлим­тал, хIакинтал, аьралийтал, учительтал, культуралул зузалт, спортсментал, ризкьичитал ва цаймигу пишакартал.

Ва хьунабакьаврил сакиншинначитуравасса ца, ЧIяйннал школалул ххаллилсса тарихран хас бувсса луттирал автор, Оьмаров МахIаммадгу вай выпускниктуравасса ца хъанай ур. ЛичIи-личIисса сававртту багьана хьуну, чIявуссаннаща бучIан хьуну бакъая шиккун. Бакъанугу, цив бавтIминнащал дакIнихтуну буссару тIий, Москавлия, Бакуя, шиккувасса шагьрурдая ва зунттал щархъава оьвтIиссагу чансса ба­къая. Вайннал икьралгу дурну диркIун дур, гьашину сайки циняв выпускниктал 70 шинал оьрмулувун бухлахисса бухьувкун, школа къуртал бувсса чIумущал ва гьарнан аьмсса ишгу кIицI лаган.
Хьунабакьаву дайдирхьуна ахиратрал хьусса цащала дуклай бивкIми ва цала учительтал дакIнийн бичаврия ва миннал аьпалун, лавайгу бивзун, ца дакьикьалийсса пахъ багьаврия.
Хьунабакьаву лахъа-хъун дан бувкIун бия, ца ЧIяйннал жяматраву бакъа, щала миллатрал дянивгу хIурмат лавай­сса, школалул бусравсса выпускниктурал кьюкьлул бакIрайсса МахIаммад Айдаев ва ТIалхIат АьбдурахIмановгу.
Хьунабакьаву дачин дур­сса МахIаммад Оьмаровлул дур­ккуна цащала дуклай бивкIсса кIивагу классрал выпускниктурал сияхIрайсса цIарду. ДакIнийн бивчуна цахьра дарсру дирхьу­сса, личIи-личIисса шагьрурдая ва щархъава цачIанма тIайла бувккун бивкIсса тани­сса учительталгу.
Цащала дуклай бивкIми кка­ккан ччишиврул, ххуллул манзилданухгу, хIакьинусса къабигьа­сса тагьарданухгу къабурувгун, Къизлардая бувкIун бия ДР-лул лайкь хьусса хIакин Аьбдуллаева ПатIимат, ДР-лул лайкь хьу­сса строитель Кьадирова Лайла, СсурхIиял шяравасса Абубакаров МахIаммад, МахIачкъалаллал муххал ххуллул хъунама инженер Ссунгъуров ХIажи, куклумур промышленностьрал лайкь хьу­сса зузала Мансуров Минкаил, автохозяйствалул лайкь хьу­сса зузала Рамазанова Лиза, Ибрагьимова Роза, Халикьов МахIаммадрасул. Цинявннал махъругу лавхъун, школалуцIун дархIусса чIуннугу дакIнийн дирчуну, шиккун бучIан бювхъаврихлу цаннахь ца барчаллагьрай бия.
Хьунабакьаву чIюлу дуру­на мандолиналий ва гармун-дачIулухун хъинсса лакку макьанну дурцусса ХIажи Оьмаровлул, Ибрагьим Оьмаровлул ва Расул Башанаевлул.