Вай гьантрай ГьунчIукьатIрал шяраву хьунни хъуннасса байран –Шяраваллил кьини.
Р. Къардашов
Буттал миналийн бувкIун бия шагьрурдайх, Аьрасатнавух ва чил билаятирттайх ппив хьусса щарнил агьлу-жямат. Байрандалул сиптачину хьунни ДРОО «Возрождение Унчукатля» ва шяраваллил администрация.
Цалчинмур кьини дайдирхьуна жямат хIатталлийн бавтIун алхIам буккаврийну, аьпалувух бивхьуми дакIнийн бичаврийну. Шиккува агьалинал хьхьичIун буккан бувунни жяматрал ххазина, ХIХ ттуршукулул дайдихьулийва Кумиял СалихIлул каних чивчуну бивкIсса кьуран.
Хъирив ккурчIав тIиртIуна митинг. Му дачин дурну ия шяраваллил администрациялул хъунама МухIад Штанчаев.
ДРОО «Возрождение Унчукатля» председатель ХIажибутта ХIусайновлул барчаллагь увкунни бувкIсса хъамаллурахь. Шяраваллил кьини лахъсса даражалий хIадур дурсса штабрал члентуран буллунни барчаллагьрал чагъарду. Шяравалу утта дуккан дуллай захIмат бихьлахьисса шяравучутуран Лакрал райондалул администрациялул чулуха Ансар Къажлаевлул дуллунни ХIурматрал грамотартту.
ХIадур дурну дия ГьунчIукьатIрал шяраву ХIХ ттуршукулия байбивхьуну, махъсса заманнай ичIура ишла дуллай бивкIсса кьай-кьуйлул выставка.
Хъунная шяраваллил кьинилун хас дурсса мероприятиярттал сияхIгу.
Миннува яла «нахIумурну» хьунни пулавбувултрал бяст-ччал. Бивщунни къушру, бивзунни къазан-кIункIурду, шавхьсса пулаврдугу шадлугърал журалий биян бувунни судиятурал ссупралийн. Лахъсса, ца ххуттайсса кьиматру бивщунни пулавбувултрал дукиялун. Шиккува хьунни тяхъасса мажлисгу.
Спортрал соревнованияртту – шахматрал, боксрал, армрестлинграл, пут гьаз даврил, пут личаврил най дия шанма гьантлий. Спортсментал бувкIун бия шагьрурдая, чIаххувсса шяраваллава, Ахъушиял ва Лаващиял райондалия. Ххув хьуминнан дуллунни грамотартту, кубокру ва арцуйнусса бахшишру.
ЦIан ларкьукун, къавтIаврил ва балай учаврил мажлис тIивтIуна фейерверкирттал савлугърайну. Байрандалул шадлугъру къуртал хьуна дусшиврул ва цашиврул ламурду шяраваллил агьулданул дянив хъиннува цIакь хьунсса ниятрай.
ЯлунчIилгу августрал цалчинмур алхIаткьини хьунабакьинсса умуд-пикри бур ГьунчIукьатIрал шяраваллил жяматран.
ГьунчIукьатIрал шяраваллил байрандалуцIун бавхIусса суаллу-жавабру чирчусса ДРОО «Возрождение Унчукатля» председатель ХIажибутта ХIусайновлущалсса ихтилат бищунну кказитрал хъиривсса номерданий.
