Вай гьантрай Лакрал райондалул бакIчи Юсуп МахIаммадовлучIа хьунни Гъумучиял шяраваллил бакIчи МахIаммад ХIусниевлущалсса хьунабакьаву. Ххал бигьлагьисса суаллаву яла агьаммурну бия махъсса кIира-шанна шинай агьалинал дянив Гъумучиял базаллуцIун бавхIусса масъала.
Зулайхат Тахакьаева
«Илчилул» хьхьичIми номердавасса цанний рирщуну дуссия мува иширал хIакъиравусса райондалул бакIчинал оьвчаву.
Райондалул администрациялул информациялул ва аналитикалул отделданул «Одноклассники» соцсетьрай дурсса цIуххаврил хIасиллайн бувну, 67% агьалинал чIурду буллуну бур, базар цила тарихийсса кIанттайн бизан бувну, базаллул лагма-ялттусса кIантту бакьин бансса пикрилухлу, 32% агьалинан ччай бусса бур базар цIусса кIанттайн бизан бан.
ЧIявучил пикрилухгу вичIи дирхьуну, Юсуп МахIаммадовлул хIукму бунни Гъумучиял базар бизан бан цуппа бивкIсса кIанттайн. Шяраваллил бакIчинайн тапшургу бунни базар махъунмай бизан бан ва зурул 22-ннийн, яни ттисса хамискьининин (базаркьини), ккаккан бан машачитурансса ва транспорт дацIан дансса кIанттурдугу.
Ихтилат бунни базаллул кьатIув маша буллалиминнай аьчIа дишаврил хIакъиравугу.
