Цалчинмур ЦIувкIратусса Садикьлул душ ХIусайханова Изагуран 5 шин дур, ва МахIачкъалаллал 37-мур садикрайн занай бур.

ХIисав барча, садик Изагурал бигьалагай кIану бур, ванил диялсса чIун гьан дувайсса дур гимнастикалул тренировкарттай.

---

П. Рамазанова
КарчI ва чIиви душния архсса зат дур. «Ттун кIулли, чIумуй мяш къавхьуну, карчI къадурну, хIарачат булларча, чIири-хъунсса хIасиллу гъан-маччами ххари буллалисса дикIайшиву, утти ва ххуллийн бувкнавхьур, ттун ччай бур хьхьичIун буклан», — тIий бур чIава аьнтIикIа.

ЖучIара художествалул гимнастика личIину машгьурну дакъар, ва журалул федерация 2018 шинал хIасул бувну бур. Иза­гурагу гимнастикалийн занан бивкIун бур ларгсса шинал. Ва чIирисса чIумул мутталий Изагурал хьхьичIунсса кIанттурду бувгьунни соревнованиярттай. Елена Исинбаевал цIанийсса стадиондалий хьусса художествалул гимнастикалул чемпионатрай 3-мур кIану бувгьунни. Бакуй хьусса дунияллул халкьуннал дянивсса турнирданийгу – 3-мур кIану. Школарттал соревнованиялий цалчинмур кIану бувгьуну бур, «Каспийские ласточки» тIисса цIанилу МахIачкъалалив ттигъанну хьусса соревнованиярттайгу 1-мур кIану бувгьунни.

ЦIанихсса пагьламантурал шяраватусса наслулия бухьувкун, генардалгу иш бухьунссар. Гьунар бусса, пирпилу кунма, гьанан, тIанкIа тIун бикIайсса душнийн ванил тренертурал ва ичIувацириннал хъуннасса вихшала дур.
ТIайлабацIу баннав вин, гимнастикалул хIурулъэн, Ма­хIаммадбагхъал Садикьлул ва Нуруллагьхъал Марияннул Иза­гурай!