Вай гьантрай Каспийскалий хьунни «Жемчужина седого Каспия» тIисса цIанилусса батIаву. Ва сакин дурну дия «Аьрасатнал ниттихъул» тIисса суккушиндарал кIанттул отделениялул ва Ф. Аьлиевал цIанийсса шагьрулул библиотекалул системалул проектну хъанахъисса Хъаннил клубрал.

Клубравусса хъами кIул бувна Дагъусттаннал тарихращал ва культуралущал.
Шадлугърал цалчинмур бутIа хьуна Каспийск шагьрулул улча лахьхьаврил музейраву. Клубрал гьурттучитурал вичIи дирхьуна шагьрулул тарихраясса лекциялух. КIилчинмур бутIа хьуна Ф. Аьлиевал цIанийсса шагьрулул хъунмур библиотекалуву. Шиву гьарцагу хъамитайпалул бувсуна циятува, цуппа ссаха зий буссарив. Хъаннил дянив хьуна викторина, личIи-личIисса командарттайх бавчIуну, творчествалул бяст-ччал. Дурсса хIасиллайн бувну ххув хьуна «Каспийскаллал читIри» тIимур команда. Бахшишран вайннан буллуна турт, вайннахь бувсуна туртуя инсаннал цIуллу-сагъшиврун цуксса мюнпат буссаривгу.