Ххирасса лак! Барча тIий буру цинявппагу бусурмантурахь Зумаритавал байран! Махъ бакъа, ислам диндалул календарьданий ва байрандалул бугьлагьиссар ца яла хьхьичIунмур ва кьадру ххимур кIантту. Зумадугьул зурул мубараксса кьинирдацIун дархIусса дур ялувсса Заннал ва Аьрщарайсса умматрал дянивсса имандалул мяъна ва мурад. Ми цинярдагу кьинирду зул оьрмулуву барачатну дацIаннав. Ххишала хьуннав жула цинявнналагу дакIурдиву ххуй-хъиншиврул чани. Кьамулну лякъиннав Заннан зу дургьусса зумарду, бияннав миннул шапааьт щалвагу Дагъусттаннал илданийн. Дунияллийцири бусурман агьлу, цащалва цивппагу, чийщалгу бавкьуну, нахIуну яхъананнав!
***
[dropcap]З[/dropcap]умаритавал байран кьини – хъинну ххирасса кьинири. ХIатта, Аллагьу Тааьланал Алжан му кьинир, тIар, ляхъан бувсса. ТIуба тIисса Алжаннавусса яла хъунмур мурхь му кьини бивщуссар, тIар. Жабраил малаик вахIишиврийн ихтияр увссагу му кьинир, тIар. Мунивусса пасилартту, хъиншивуртту чIярусса дур. Му кьини хъинсса аьмал баву, Аллагь чIявуну кIицI лагаву хъинссар. Дуаьлухьхьун жаваб дулайсса, бунагьру шюшайсса, Аллагь цIимилийну ургайсса кьинир. Му хьхьуну, баргъ лавгун махъ, Эдрал чак булланнин, кIичIирттаву, мизитирттаву, къатраву, чув бухьурчагу, такбирду бишавугу суннатссар, баянну оьвкуну, Эдрал кьинилул аьламат загьир дуван. Зумаритавал хьхьу уттара давугу хъинссар, тIар, эбадат дуллай ¬Кьуръан ккалай, зикри-ссалават ккалай.
КIюрххил Эдрал чаклийн ачиннин чурх шювшуну, марцIшиву дурну, ххаллилсса янна лаххаву, нахIусса кьанкь даву суннатссар. Эдрал кьини чак баннин мукьттуршва «Ля илагьа илла Ллагьу вахIдагьу ля шарика ла гьу, лагьул мулку, ва лагьул-хIамду юхIьи ваюмиту ва гьува аьла кулли шайин къадир» учирча, мукьттуршва бакI тархъан бивтссаксса чири буссар, тIар. Эдрал хьхьуну, муъминтурал рухIру ссаврунная лухччинийн лирккун, цалла къатрал лагма ккуранну дурну, оьвтIун дикIайссар, тIар, инсантуран къабаярчагу: «Жугу, зу кунма, дунияллий ми къатрал, ми хъуслил заллухъруну бивкIссару, жугу дакIнийн бичияра, жухлуну цадакьагу бувара, жул гьаттайн зияратгу бувара, дуаь дувара, жунгу жува бувсса хъинсса аьмал бакъа къалявкъунни», – тIий. Му кьини, ливтIуминнал гьаттайн зияратгу бувну, миннаяту цадакьагу бувну, ххуйсса яннагу ларххун, ххуйсса хIалалсса дукрардугу дурну, кувнначIан кув лавгун, хIалалшиву ласаву хъинссар, суннатссар.
