[dropcap]В[/dropcap]ай гьантрай оьрмулул 70 шин бартларгунни ххаллилсса лакку хъамитайпа, бусравсса нитти-буттал душ, ЧIурттащиял шяравасса Эффендиева Таибатлун.
Ва гьарнащал хIал бавкьусса, дусшиву дангу-ядангу кIулсса, дакI аьчухсса, учин-бусан кIулсса, уздансса, мяйжаннугусса зунттал хъамитайпа бур. ЧIярусса шиннардий медициналул аралуву зий Таибатлул ххуйсса цIа кьариртссар. Хъунмасса захIмат бувну цилалу (тай захIматсса шиннардий) ххуйсса тарбиягу дуллуну оьрчIру хъуни бувссар.
Аьзизсса Таибат, чIа тIий буру вин цIакьсса цIуллушиву, ххаришивуртту, оьрмулул цинявппагу неъматру. Гьаннав вил щала оьрму оьрчIал, оьрчIал оьрчIал вив лавсун, миннал хъихъи битлай.
Мудангу виха дуаьлийсса вил дустал, чIунархIал
хъами, ина ххирами.
Жул ххирасса, аьзизсса нинуй!
Барча дуллай буру ина бувсса кьини.
ЧIа тIий буру вин цIуллушиву, ххаришивуртту, чаннасса лахъисса оьрмулул ххуллу. БакIралгу ххуйсса, тIул-тIабиаьтралгу даркьусса, тIуллугу уздансса, бургъил нур куннасса, жул дадай, вияту нанисса чанигу, гъилишивугу асар къахъанахъисса ца лахIзавагу къавхьуссар жул оьрмулуву.
Ина лайкьссара арцу-мусил, якьут-алмасирттал таж бакIрай бишин.
Ина хIасул дурссар жун рахIатсса тIюва, лайкьсса оьрмулул шартIру, гьаз дурссар жул цIарду. Жугу хIарачат банну, дадай, виха лавхьхьуну къуццу тIун, бусравсса жула кулпатрал цIа лайкьну дуруччин.
Ина дазу-зума дакъа
ххирасса вил душру:
Диляра, Светлана, Людмила, Шамира, Дильбара.
[dropcap]Ч[/dropcap]Iярусса шиннардий Нальчик шагьрулий гъурбатрай ялапар хъанай бунугу буттал кIанттущалсса дахIаву руцан къаритайсса, буттал шяравалугу, миллатгу ххирасса ххаллилсса зунттал душ, Хъуннащиял шяравасса Оьмарова ХъункIултIутIи «Илчи» кказитралгу ччянивасса дусгур, буккугур.
21
ДакIнихтуну барчагу буллай, чIа тIий буру цIуллушиву, талихI-тирхханнарайсса оьрму. Вила ласналгу, душвавралгу, миннал оьрчIалгу ххари буллай, оьрмулия щалихханнин битаннав.
Вил хIурмат бусса «Илчи» кказитрал редакция.
