Сентябрьданул 25-нний Султанянгиюртуллал 2-мур школалий лахъа-хъунну кIицI лагарду Совет Союзрал Виричу ХIажи Бугъановлул 100 шинал юбилей.
Байрандалий гьуртту хьун бувкIун бия чIявусса бусравсса хъамал: Лакрал райондалул администрациялул бакIчи Юсуп МахIаммадов, ЦIуссалакрал райондалул администрациялул бакIчинал хъиривчу Аьвдурашид Буттаев, Гъумучиял школалул директор Хадижат ХIусниева, Къизилюртуллал райондалул администрациялул бакIчинал хъиривчутал Гагарин Оьмаров ва Ибрагьим МутIаллибов, Дагъусттаннал Гостелерадиолул председательнал цалчинма хъиривчу Ссалам Хавчаев ва м.ц.
Хъанардал (Султанянгиюртуллал 2-мур) школалул учительтурал коллектив, дуклаки оьрчIал нину-ппу барчаллагьрай бур Давуд Ибрагьимовичлуйн, чIирисса чIумул дянив дурсса хъуннасса даврихлу.
2015 шинал, Ххувшаврил байрандалул гьантрай, жул школалий шадлугърал даражалий тIиртIуссия Виричунал гьайкал. Танигу цала арснащал Элмурадлущал Давудлул хъуннасса даву дурссия ва гьайкал дацIан даврил ххуллий.
Ванала сипталийну сентябрь зуруй, ХIажи Бугъанов увсса кьинилуцIун бавхIуну, жул школалул учительтал ва дуклаки оьрчIру, директор бакIчину, лавгссару Лакрал райондалийн, Виричунал ватандалийн биян. КIива гьантлул дянив бивссияв Гъумук жула тарихрацIун бавхIусса чIявусса кIанттурдайн. Хъинну мюнпатсса ва дакIний личIансса аьрххи хьуна.
Хъунмасса кумаг ва хIарачат бивхьуссар Давудлул школалий ХIажи Бугъановлул музей тIитIингу, шивусса экспонатру цачIун дангу.
Индира Оьмарова,
Султанянгиюртуллал 2-мур школалул оьрус мазрал ва литературалул учительница
