Булбул Оьмариева

Аьзизсса арсру аьрай бусса ниттихъул!
Зул пашманшиврул чIарах къабуккан, зул шану бакъасса хьхьурдугу, дакIнивусса къювурдугу чIалай, виртталсса ва эбратрансса арсру хъуни бувсса зун хас дурну, чичав на вай ца-кIира назму. Хьулданийгу бура, чIумуй дяъвирдугу яла лавгун, паракьатсса бигьа-рахIатсса оьрму ялун биянссархха тIий.

Жалин щащар мабара

Дуручча, бавал, Ватан,
Шала дуца дуниял,
Вил ппу дяъвилий ливчIсса,
Щащардича вил бава.

Ссавнийх цIупарду ришлай,
ЛачIлайнна дур гъаралгу,
Ялунмай хъювхъу тIий бур
Вих ялугьи яругу.

Бавал, на кунма, щащар
Мабара вила жалин,
Ниттил лякьлуву уна,
Ятин шайча арсная.

Дуручча, бавал, аьрщи,
Шала дуца дуниял,
Инавагу цIарава
ЦIуллуну зана икIу.

Виричунаха

Оьсса дунияллул
Дазуй авцIуну,
Душманнал хьхьичI ияв
Ина къалану.

Базурдаву бусса
Бюхъу харж буллай,
Кьаст оьминнайн кьутIин
Ччалану ацIлай.

Илданул талихIрал
Дазуй авцIуну,
Ина жан дуллунни,
Жард къаувкуну.

НякI цIарал кьамарай

НякI цIарал кьамарай
Ссаврду ххядуклай,
Ссурулун ххяхлай бур
Чаннаннил дучри.

Бюхттулнийн гьаз буллай
БивкIулул байрахъ,
Янсаврал ламарайн
Буклай бур вирттал.

Жагьилсса жандалий
ХIайп къаувкуну,
НякI цIарал ламарайн
Ххяхлай бур вирттал.