ЦIуссалакрал райондалул администрациялий хьунни коронавирусрал инфекция ппив къашаву мурадрайсса оператив штабрал батIаву.
Ва дачин дурну ия райондалул бакIчи ва штабрал каялувчи МахIаммадхIажи Айдиев. Микку гьуртту хьунни райондалул шяраваллал бакIчитал.
Андриана Аьбдуллаева
МахIаммадхIажи Айдиевлул гьаз бунни коронавирусрал пандемиялуцIун бавхIуну захIматсса тагьардануву ливчIсса райондалул агьалинан кумаг баврил хIакъиравусса масъала. Ванал кIицI лавгунни, карантиндалуцIун бавхIуну, цаппара инсантал доходрацIа хьуну бушиву ва миннан дуки-хIачIиялийнусса кумаг цIана ххуйну бучIи лякъиншиву. Оператив штабравуминнал ва шяраваллал бакIчитурал хIукму бунни, кумаг аьркинминнал сияхIругу щаллу дурну, чирилул давривух хIала буххансса меценатътурайн буккан. Кумаг бансса арцул 50 % итабакьинтIий бур райондалул бюджетрава.
