Март зурул 13-нний Национал библиотекалул конференц-залдануву хьунни Апанни Къапиевлун 110 шин шаврин хасъсса мажлис.
П. Рамазанова
Мажлис бачин бувну ия Дагъусттаннал халкьуннал шаэр МахIаммад АхIмадов. Ванал цалва ихтилатраву бувсунни Апанни Къапиев щалвагу Аьрасатнал, дунияллул оьрус мазрайсса литературалул рувхIанийсса ирс-ххазинану хъанахъишиву. Ванал батIлай ва цачIун буллай ивкIшиву литературалул гужру.
«Апанни Къапиев къаивкIссания, дагъусттаннал литературалуву чIярусса цIарду къадикIантIиссия, мунан хъинну ххуйну кIулну бивкIун бур оьрус маз, усттарну таржума бувну бур АбутIалиб Гъапуровлул, Сулайман Стальскийл, Батырайл, МахIмудлул, Аьбдулла МахIаммадовлул произведенияртту, мунал таржумарттайхчIинни дунияллун дагъусттаннал тамансса шаэртурал цIарду кIул хьуссагу», — увкунни АхIмадовлул.
Театровед Гулизар Султановал бувсунни 1952 шиная шинмай Лакрал театр пахрулий ядуллай ва гьаз дуллай бушиву Апанни Къапиевлул цIа, мунал «Фронтрайсса дневникру» гьануну лавсун, хIадур бувшиву оьрус мазрайсса спектакль, му спектакль оьрус мазрай хIадур баврил гьанумур сававгу душиву мунал творчествалия чIявусса инсантуран хавар бикIаншиврул. Бувсунни Апанни Къапиевлул театрданущал цIакьсса дахIаву диркIшиву, гьунар бусса художникгу ивкIшиву, декорациярдугума хIадур дуллай хIала увххун ивкIшиву, бувсунни Апаннинал, оьрус мазрайн таржумагу бувну, «Дагъусттаннал антологиялий» бивщушиву Гьарун Саэдовлул «Къалайчитал» тIисса социал драмалул цалчинмур акт.
ЦIа дурксса Дагъусттаннал чичулт АхIмад Жачаевлул, Шойтханум Аьлишевал, Аминат Аьбдулманаповал, Космина Исрапиловал, Ссугъури Увайсовлул, Марина АхIмадовал цалвами ихтилатирттаву лахъсса кьимат бивщунни Къапиевлул творчествалун.
Гулинжан Кьурбановал бувккунни АбутIалиб Гъапуровлул Апанни Къапиевлун хас бувну чивчусса шеъри. Лакрал театрданул артистурал ккаккан бунни Къапиевлул фронтрай дурсса чичрурду гьануну ларсун хIадур бувсса «Духкъалагайсса макь» тIисса спектакльданувасса фрагмент.
