Ларгсса нюжмардий «ХIакъикъат» кказитрал редакциялий хьу­н­ни ХIамзат ЦIадассал цIанийсса Яруссаннал музыкалул ва драмалул театрданун 80 шин хъанахъисса юбилейрал хьунийнсса пресс-конференция.

Залму АьбдурахIманова
Театрданул тарихрая ва хIакьи­ну театрданул оьрмулуву хъанахъисса дахханашивурттая ва цIушиннардия журналистътурахь гьарта-гьарзану бувсунни театрданул директор МахIаммадрасул МахIаммадрасуловлул. Ванал кIицI лавгунни, декабрьданул 4-нний хьунтIисса юбилейрал шадлугърал кьини театрданул фойераву музыкалул ва фольклорданул майданну тIивтIуну ва «Этапы большого пути» тIисса театрданул оьрмулун хасъсса фотовыставкагу дикIантIишиву.
Хъирив театрданул хъунмур сахIналий хьунтIий бур юбилейрал агьаммур бутIа – республикалул каялувчиталгу гьурттусса шадлугърал батIаву. Ва агьамсса кьинилул ахирданийгу Яруссаннал театрданул сахIналий хьунтIиссар, республикалул сайки циняв театрду гьурттусса, музыкалул ва театрализованныйсса юбилейрал хъуннасса шадлугъ.
Яруссаннал театрданул гьану бивзун бур Ххунзахъиял райондалий архсса 1935 шинал. Хъунмасса Буттал КIанттул цIанийсса дяъви байбивхьусса шинал театрданул щалва коллективрал, душру-хъами личIи бакъа, чивчуну бур цалва хушрай дяъвилийн буцин тавакъю буллалисса аьрзри. Дунияллул театрдал тарихраву нажагь бакъа къахьунабакьин бюхъай укун цалархIал щалва коллектив дяъвилул цIаравун лавгсса иш. Цалчинсса актертурал коллективрава бачIиссаннан кьисмат хьуну бур дяъвилул майданнай жанну харж дуван ва ятIа-тIар бакъа бакъа-къатIа хьун.
Цува зузисса 2 шинал дянив театрданул хIакьинусса оьрмулуву хьусса дахханашивурттая буслай, М. МахIаммадрасуловлул кIицI лавгунни, ттинин, цув учIаннин, театр зий бивкIхьурча ца режиссернащал, утти коллектив зий бушиву шама режиссернащал.
ЦIусса директор учIаврищал, театрдануву хьуну дур тамансса ххуй чулиннайсса дахханашивуртту. Бювхъуссаксса цIубуллай бусса бур материалданул база. ЧIярусса да­хханашивуртту хьуну дур гастроллал давривугу.
— Зунттал щархъавун чун нарчагу, театрданул цащала архIал ласайссар шагьрулийсса тамашачинал хьхьичIун дуккан дувайсса декорация. Жул актертуран тамашачи, чув ухьурчагу личIишиву дакъа, жул тамашачири. Жул театрданух, жул актертурах мюхтажсса шяраваллавусса тамашачитуран «халтура» ккаккан дурну, гьарзатрая увччусса, дядалан хьусса шагьрулул тамашачинан цила багьайкунсса декорациялущалсса пьесарду бихьлахьаву къатIайлассар. ХьхьичIра Яруссаннал театрданул ххуйсса аьдат дикIайссия пьесалия махъ чIири-хъунсса концерт ккаккан дувайсса. Му цаппара хIаллай хъамадитулул хьусса аьдатгу жу цIунилла цIудуккан дуварду, -бувсунни ванал.
МахIаммадрасул учIаврищал, Яруссаннал театрдануву хьуну дур ттинин Дагъусттаннал вайми театрдаву ишла дуван дурасса синхронсса таржумалул оборудование щурущи дурсса цIушиннагу.
Вайми миллатраясса ччима инсаннаща бюхъайсса бур, наушник­ругу ларххун, оьрус мазрайсса таржумалухун сахIналий хъана­хъимуний тамаша буван. ХIакьину театрданул хьхьичI бавцIусса ца­ппара къизгъинми масъаларттая буслай, М. МахIаммадрасуловлул кIицI лавгунни, цал труппалун биялну бакъашиву жагьилсса актертал ва уттизаманнул обществалул масъалартту гьаз буллалисса драматургтурал пьесарду. Сайки вайми миллатирттал театрдаву кунма. Ванал чIурчIав дунни цув рязийну акъашиврий, ДГУ-раву тIивтIусса, актертал хIадур бай­сса факультетрал республикалул театрдащал дахIаву дакъашиврия ва цал театр хIадуршиврий студент дуклакиссаксса хIаллай, му кьянкьа-кьурчIи хьуншиврул, цала сахIналийн уккан уллан, цалва пьесардавух гьуртту уван. Актернал пиша язи бувгьусса студентнан диплом лавсун махънияр дуклакиссаксса чIумала театрданул, сахIналул тIин-тIюъму бувчIуну хъиншиврий.