Май зурул 12-нний Дагъусттаннай ва Аьрасатнаву физикалуха зузиминнан ххуйну кIулсса, Дагъусттаннал элмий­сса центрданул Физикалул институтрал аьлимчу ХIамзал арс ХIажиев ХIажинан бартлаглай дур 80 шин.

ХIажи увссар 1936 шинал ТIаннул ЦIувкIуллал шяраву. 1954 шинал ЧIяв дянивмур даражалул школагу къуртал бувну, гара шинал увхссар Да­гъусттаннал институтрал физикалул ва математикалул факультетрайн. ХьхьичIунну дуклакаврищал, институтрал жяматий­сса давурттавух чялишну гьуртту хъанай ивкIссар.
1959 шинал университетгу къуртал бувну ЯтIул дипломращал, ХIажи 2 шинай зий уссия Бущихъиял (Ботлихский) райондалий шяраваллил дянивмур даражалул школалий физикалул ва математикалул учительну.
1961 шинал ХIажи зун айивхьуссар СССР-данул Дагъус­ттаннайсса элмийсса центрданул Физикалул институтраву. 1963 шинал, зий уна, дуклай айивхьуссар аспирантуралуву. Ганал элмийсса каялувчину бивкIссар хьхьичIунсса аьлимчу, СССР-данул ва Азирбижаннал Элмурдал академиярттал академик Х. И. Амирханов ва физикалул ва математикалул элмийсса кандидат МахIаммадов Ясупи.
Аспирантуралуву дуклаки­ссаксса хIаллай ХIажинал цала кIилчинма каялувчинащал сакин дурну, зузи дурну дур кIирисса температурардай полупроводникирдал дарцIаннин ва дарцIуну махъ гайннул дарцIиншиннардал хасъсса хасиятру ххал дигьайсса сакиншиннарду. Вай сакиншиннардал кумаграйну дунияллий физикалул элмулуву хьхьичIра-хьхьичI ххал диргьуну дур ца­ппарасса полупроводникирттал ва гайннул дарцIиншиннардал хасъсса хасиятру.
1972 шинал ХIажинал Горький шагьрулий дурурччуссар физикалул ва математикалул элмурдал кандидатнал цIанин лайкьсса диссертация. 1961 шиная шинай, 60 шинал мутталий зий ур ХIажи, лахъсса температурардай полупроводникирттал ва гайннул дарцIиншиннардал хасъсса хасиятру ххал дигьлай, Дагъусттаннал элмийсса центр­данул Физикалул институтраву. Ва проблемалуха зун 1964 шинал Физикалул институтраву тIивтIуссар цIусса лаборатория (Лаборатория физики твердого тела). Ва лабораториялуву цала элмийсса каялувчинал кумаграйну хьхьичIунсса аьлимчунал Физикалул институтраву дузал дурну дур цIусса, уттинин къадиркIсса, экспериментал сакиншиннарду. Вай сакиншиннарду уттигу, физикалул элмулуву дух къархьуну, жучIара ва чил билаятирттай ишла дуллайнма бур. Вайннул кумаграйну лабораториялуву ххал диргьуну дур 70-нния лирчусса полупроводникирттал ва гайннул дарцIиншиннардал теплопроводность, термоэдс ва электропроводность.
Физикалул институтраву элмулуха зий уна, ХIажи ДГУ-раву ва Дагъусттаннал педагогикалул институтраву студентътурахь лекциярду ккалай, жагьил­сса аьлимтурал курсовой ва дипломный давурттал каялувшиву дуллай зий ивкIссар.
ХIажи, цалла дуллалисса давурттая буслай, жучIава ва цайми хIукуматирттай гьуртту хьуну ур щаллагу дунияллий физикалуха зузисса, аьлимтал бавтIун щаллу дайсса, 50-нния лирчу­сса даккавурттай (Международные конференции). ХIажинал чирчуну дур жулва ва чил билаятир­ттал элмийсса журналлай 150-нния лирчусса элмийсса давуртту.
ХьхьичIунсса элмийсса ва жяматийсса захIматрахлу ХIажинан СССР-данул Элмийсса академиялул Президиумрал ХIурматрал грамотартту, чIярусса цаймигу хIукуматрал ва Элмурдал академиялул медаллу, грамотартту ва цаймигу бахшишру дуллуну дур.
ХIажи ур жулва миллатран, Дагъусттаннан бусравсса, щалвагу Аьрасатнаву ва цайми билаятирттай физикалуха зузисса аьлимтуран ххуй чулуха кIулсса, цащала зузиминначIа ва цачIава дуклай бивкIминначIа хъунма­сса хIурматрай оьрму бутлати­сса аьлим­чу. Ва ур ххишала акъа дакI марцIсса, аьмал хъин­сса, Лакку билаят, тIабиаьт ххирасса, лакрал зунттах, лакрах дазу дакъа ччаву дусса аьчухсса дакIнил заллу.
Ва ххаллилсса лаккучу, цIа дурксса аьлимчу оьрмулул 80 шин шаврищал барча уллай бур Дагъусттаннал Элмийсса центрданул Физикалул институтрал зузалт, ванал чIявусса дустал, гьалмахтал, кIулми, шяравуми.
ХIажи хъинсса, тIиртIусса дакIнищал, иминсса хасиятращал, дугърисса тIуллащал жун ххирану личIантIиссар ттигу чIярусса шиннардий.
Дустал, гъан-маччами, ЦIувкIуллал жямат, даврил уртакьтал