Ккуллал райондалийсса ЧIяйннал школа мудангу хьхьичIунсса, ххуйсса ккаккияртту чIалачIи дуллалисса, лавайсса даражалул пишакартал зузисса школалун ккаллину бивкIссар. 80-хъайсса шиннардил лажиндарайсса тарихрай ва школалия итабавкьусса оьрчIру хьхьичIунсса пишакартал хьуну, личIи-личIисса жаваб­лувсса къуллугъирттай зий бур. ЧIяйннал школалул учительтурал кIулшивуртту дуллусса оьрчIан Аьрасатнаву яла сий думи ВУЗир­ттавун ххуллурду тIивтIуну бивкIссар.

Ва школалул тай шиннардийва бивзсса цIакьсса гьану хIакьинусса кьинигу яхьуну бур. ЧIяйннал школалул выпускниктурал ххаллилсса аьдат дур, кувннал кувннащалсса дахIаву хIура хьун къадиртун, чIун-чIумуй хьунабакьлакьисса.
Вай гьантрай, школа къуртал бувну 40 шин ларгун махъ, хьунабавкьунни ЧIяйннал школалул 30-мур выпускрал оьрчIру. Вайннал ва цалчинсса хьунабакьаву дакъая, амма вайннаву бия школа къуртал бувну мукьах цалчин шикку хьунабакьлакьиссагу. Вай цивппагу бия ва кьини дучIаннин ссавур дакъа гьантри ккалай бивкIру, цума цукун аххана хьуну урвав, кувннан кув бувчIинавав тIий. Мяйжаннугу, 40 шин – му чIивисса мутта ба­къар, танийсса жагьилтурал цIана цалва-цалва кулпатру, оьрчIру, оьрчIал оьрчIру хьуну бур.

Школа къуртал бувну махъ цалчин ккаклакисса оьрчIру кувннан кув къабувчIлай, хъямала багьлай, иттав макь дукIлай бия. Ва хьунабакьаврил тIааьнсса лахIзардайну чIалай бия вай оьрчIал, душварал школалий дуклакинийра цIакьсса дусшиву диркIшиву, вай кувннан кув хъинну ххирасса бушиву. Вайннал школа къуртал бувсса 1975 шинал итабавкьуну бур сайки зуви-зувия оьрчIру бусса 2 класс. Тай шиннардий цIанихсса ЧIяйннал школалийн занай бивкIун бур Хъюйятусса, Ваччатусса, СумбатIлиясса, 1-мур ЦIувкIратусса, Ккулатусса оьрчIру бакъассагу, Кьассагуллаясса ссурхIиял оьрчIругу. Вайгу хIакьинугу барчаллагьрай кIицI лаглайнма бия цанма чил шяраву бушиву асар хьун къабивтсса ЧIяйннал жяматгу, цахьра дарсру дирхьусса учительталгу.
Ва выпускрал оьрчIава 3-ннал къуртал бувну бур школа мусил медалданущал, 80% выпускниктурал ларсун дур лавайсса даражалул кIулшивуртту. Вайннаву 4 инсан ур личIи-личIисса пишардаву лайкьсса зузалал цIа ларсъсса, 7 ур личIи-личIисса элмурдал кандидат. ЦIанасса ва хьунабакьаврил сиптачину хьусса Исяев Ися ур Ваччиял шяравасса. ЦIана ва Чачаннаву Словениянал фирмалий строитель – геодезистну зий ур. Мажал къабирияйсса давугу кьадиртун, ванан, циняв архIал дуклай бивкIми чув бурив кIул буллай, цачIун буллай, тамансса захIмат бишин багьну бур.
Хьунабакьаврил мажлис бачин бувну ия аьрали къуллугърал ветеран, хъунама прапорщик Юсупов Юсуп.
Жу, цIухху-бусу бувну, кIул барду школа къуртал бувну махъсса вай оьрчIал оьрмулияту.
Исяев Ися школа къуртал бувну мукьах увххун ур Ростоврал инженерно-строительный институтрал инженерно-экономический факультетрайн. Ряхра шинай цала шяраву Ваччав администрациялул бакIчину ивкIун ур. Махъсса шиннардий цалва пишалий, инженер-геодезистну, зий ур Чачаннаву. Ванал лайкь дурну дур «Заслуженный строитель Чеченской республики» тIисса бусравсса цIа.
Ва выпускраву хьхьичIунну дуклай ивкIсса оьрчIавасса ца ур Юсупов Юсуп. Школа къуртал бувну махъ ванал язи бувгьуну бур аьраличунал пиша. Сайки 40 шин дурну дур цалва пишалий дакI марцIну къуллугъ буллай. Вайксса шиннардий аьралуннаву къуллугъ буллай лайкь дурсса ванал наградарттавух дур Суворовлул ва цаймигу медаллу, хIурматрал грамотартту ва барчаллагьрал чагъарду.
Каримов МухIуттиннул Горький шагьрулий бувккуну бур Медициналул институт. ЦIана ва зий ур Республикалул Гигиеналул ва эпидемиологиялул центрданул хъунама хIакинну. Ва ур медициналул элмурдал кандидат, ДР-лул лайкь хьусса хIакин.
Аьбдуллаев АхIмад, Дагъус­ттаннал медициналул институтгу къуртал бувну, 7 шинай Липецк шагьрулий зий ивкIун ур. Мунияр махъ, паланг маз лахьлахьисса ординатурагу бувккуну, Дагъус­ттаннайн увкIун ур. ЦIана ва зий ур Республикалул Урологиялул центр­даний хирург-урологну. АхIмад ур лавайсса категориялул хIакин, ДР-лул лайкь хьусса хIакин.
ХIажиева Ульянагу ва выпускрахь дарс дихьлай бивкIсса учительтурал оьрчIавасса ца бур. Школа къуртал бувну махъ ванил цилва оьрму бавхIуну бур аьралуннацIун. Сайки 30 шинай аьралуннаву къуллугъ буллайгу бивкIун, утти пенсиялийн бувккун бур. Ва барчаллагьрай дакIнийн дутлай бур цила цалчинсса учитель Маммакьурбанов Сулайманнул, математикалул учитель СултанахIмадов Аьбидлул, оьрус мазрал учитель Каримов МахIаммадлул, биологиялул учитель ХIажиев Рамазаннул ва цаймигу цихьра дарс дирхьусса учительтурал цIарду.
ХIажиев Давудлул къуртал бувну бур Кировоград шагьрулий летный училище. Муния махъ бувккуну бур Москавуллал граждан авиациялул институт. Лехлай ивкIун ур ТУ-154 самолетрай Аьрасатнал шагьрурдайн ва дазул кьатIув. Ва ур авиациялул капитан.
ХIусайнов МахIаммад ур Аьра­сатнал ДОСААФ-рал профсоюзрал комитетрал председатель, АхIмад-хан Султаннул цIанийсса МахIачкъалаллал спортрал ва авиациялул клубрал хъунаманал хъиривчу.
МахIалиев Аьбдуллул тамансса шинну дурну дур Ваччиял Культуралул къатлуву зий. Махъсса шиннардий Ваччав строительствалул давурттаха зий ур. Ва хьунабакьаврий Аьбдуллул тIайлашиврия, марцIшиврия, ца зумату кунма, буслай бия ванащал архIал дуклай бивкIми.
Сяидов МахIаммад занай ивкIун ур ЧIяйннал школалийн Кьассагуллал шярава. Таний ва даргиял шярава 9-10 классирттавун ЧIяйннал школалийн бучIайсса бивкIун бур дуклаки оьрчIру. Мукун ва выпускравунгу 25 даргириоьрчI агьну ур. МахIаммадлул къуртал бувну бур Шяраваллил хозяйствалул институт ва Педагогикалул институт. Зий ивкIун ур Дарбант шагьрулул благоустройствалул управлениялул хъунаманал хъиривчуну, Каспийск шагьрулий мукуннасса управлениялул хъунаману, цIана «Акватория» тIисса строительствалул давуртту дуллалисса фирма тIиртIуну ур.
МахIаммадов Руставеллил къуртал бувну бур Новороссийскаллал лавайсса даражалул хьхьирил инженер училище. Зий ивкIун ур Сахалиннай, Мурманскалий ва цаймигу архсса шагьрурдай. ЦIана ва зий ур МахIачкъалаллал хьхьирил портрай.
Рабаданова СалихIатгу ЧIяй­ннал школалий дуклай бивкIсса ссурхIири душ бур. Ва хьунабакьаврийн бувкIун бур Ставрополлал крайрая.
— Ставрополлайн хъатIуйн увкIсса ттул одноклассник МахIаммадлул бувсун бувкIра, гьаризатгу кьадиртун. ТачIав дакIния къадукканссар ЧIяйннал школданий дуклай бивкIсса шинну. Балчаннай, ттукрай бучIайссияв жу шиккун. ХIакьину на вайннащал хьунабавкьуну 10-15 шинал жагьил хьунна.
Кьассагулмащилиясса Рабаданова Маржанат укун дакIнийн дутлай бур тай чIунну.
— ХIал бавкьусса, хъинсса бия щалагу щарнил жямат. ЦачIанма шаппай хъамалу оьвтIий, аякьалий бикIайва жуха. Барчаллагьрай бура ва хьунабакьаврийнгу, хъамакъабивтун, жуйнмагу оьвкуну тIий.
Ванатиева (Кьадиева) Калимат бур Хъусращиял шяравасса. Вайннал кулпат ялапар хъанай бивкIун бур Ваччав. 80-ку шиннардия шихунмай Калимат культуралул аралуву зий бур. Школалий дуклакинийва ва балай учин бюхъу бусса, музыкалухух лавгсса душ бивкIун бур. ЦIана Калимат бур МахIачкъалаллал музыкалул училищалул кадрардал отделданул хъунмурну зий.
Халилбагова Аминат ЧIяйннал школалийн Ваччату бувкIун бур. Школа къуртал бувну махъ, институтгу бувккуну, 80-ку шиная шихунмай ЧIяйннал школалий ингилис мазрал дарс дихьлай бур.
АьбдурахIманов Сяид цIана цува дуклай ивкIсса ЧIяйннал школалий завучну ва математикалул учительну зий ур. Ва ур ДР-лул лайкь хьусса учитель, лавайсса категориялул учитель.
Магьдиев Магьди Хъюйннал шяравасса ур. Ростовуллал пединститутрал индустриальный факультетгу къуртал бувну, строительствалул давурттаха зий ур.
Пидуриев МахIаммадлул къуртал бувну бур МахIачкъалаллал Политехнический техникум. Кьунния лирчусса шинну дурну дур хьхьирий зий. ЦIанасса чIумал ва зий ур МахIачкъалаллал муххал ххуллул идаралий.
МахIаммадов Шамил ур Бабаюртуллал райондалийсса Карашрал къутандалийсса школалий физкультуралул учительну зий.
Ва чIявусса оьрчIру, душру бусса выпуск дия. Ва хьунабакьаврийнгу сайки цинявппа бувкIун бия. Гьарная, личIи-личIину бавцIуну, буслан къахьунссар, щак бакъар вай цинявппа бусан-чичин лайкьсса инсантал бушиврий. Жу хIарачат банну уттиния тихунмайгу, вайннащал цаща-цащалва хьунабавкьуну, ихтилат бан.
Имара Саидова