«На дулунна ЕГЭ»

Дагъусттаннал КIулшиву дулаврил ва элмулул министерствалул ноябрь зуруй бувсса хIукмулийн бувну Ккуллал райондалийсса 11-ми классирттаву дуклакисса оьрчIал дянив дурунни кIулшиву ххал дуллалисса (диагностика) ЕГЭ дулаву.

Вай экзаменну дулун баврил мураднугу бия дуклаки оьрчIал кIулшиврул тагьар ххал дурну, тIайласса информация кIул дурну, хьхьара­сса, таксса оьрчIан кумаг бансса ялув бацIансса ишру дузал баву. Экзаменну дуллалиманал цIа ва фамилия къачирчунна диркIун дия чIапIай. Дянивну циняв дуллусса экзаменнал жям дурсса чIумал, чIалан бивкIун бия 60% оьрчIаща хьушиву циняв экзаменну дулун. Вай дурсса жямру цукунчIав оьрчIал, учительтурал ва школалул даврин кьимат бищавриву хIисав къадуван тIий дусса бур.

Школардал директортурал хъиривминнал дянивсса семинар

Ноябрь зурул 21-нний райондалул КIулшиву дулаврил управлениялул къатраву хьунни райондалул школарттай тарбиялулмур жаваб дулайсса хъиривминнал ва школардал библиотекарьтурал дянивсса семинар. Муний ххал бигьлай бия: дуклаки оьрчIру терроризмалийн къаршину тарбия баву, школарттал библиотекарттаву инвентаризация дурну, дуклаки оьрчIру луттирдал щаллу баву ва учебникру, зия къабувну, ябаву тIисса 3 масъала. Семинарданий гьуртту хъанай бия КIулшиву дулаврил управлениялул хъунмур ХIаммакуева Альбина, ряха завуч, школарттал библиотекарьтал ва Управлениялул тарбиялулми масъаларттал пишакар ХIусайнов Юсуп.
ОьрчIру тарбия баврин хас бувсса гьарта-гьарзасса доклад бувна Ккуллал 2-мур школалул завуч Ризванов Кьубанчил. Цила ихтилатраву ХIаммакуева Альбинал кIицI бувна: «ОьрчIан кIулшиву дулавриву цалчинмур кIанай дикIан багьлагьиссар тарбия дулаву, мяърипатрай оьрмулуву къуццу тIун лахьхьин баву. Му дакъагу, жува, оьрчIал нитти-буттахъащал цачIуну, жуйнма тапшур бувсса оьрчIал хасиятругу кIулну, гайннал дакIурдичIан ххуллу ласун хъанай бикIан багьлагьиссару. Му чIумалли жуйнма «учитель» тIисса цIа учин бучIисса», — куну.
Терроризмалийн къаршину оьрчIру тарбия баврин хас був­сса доклад бувна Ккуллал 1-мур школалул завуч Абакаровлул. Библиотекарттал луттирдал фондру цукун дуссарив бусласисса доклад бувна ЧIяйннал школалул библиотекарь Исяевал.

БакI баххана байсса затру ишла давриясса суаллу

ЦIана учительтурал, аьлимтурал дянив: «БучIиссарив школарттай дуклакисса оьрчIру наркотикру ва бакI баххана бувай­сса затру ишла дуллай бурив ххал буван?» — тIисса бяст-ччаллу най бур. Бувар ва иш уттигу чулийн буккан. Мунияту, Дагъусттаннал КIулшиву дулаврил ва элмулул министерствалул хIукмулийн бувну, Ккуллал райондалийсса школарттайсса дуклаки оьрчIахьхьун тестрал лагрулийсса суаллу буллуну бур, ци иш бурив кIул буван. Вай суаллан жавабру дуллалавриву гьуртту хьуну бур лавайми классирттаву дуклакисса 80 оьрчI. Ми хъанай бусса бур 66, 6% бугьарами оьрчIал. Дянивми классирттал оьрчIава гьуртту хьуну ур 300 оьрчI. Ми хъанай бусса бур 72% дянивми классирттал оьрчIал. Вайннал суаллан дуллусса жавабру хIисавравун ларсъсса чIумал, чIалай бусса бур жула оьрчIал 5-6 % хъанай бушиву ми аьркин да­къасса затру «ишла дуван бюхъай­сса» оьрчIруну. Му иширал ялув бацIан багьлай бусса бур нитти-буттахъан ва учительтуран.

Аьрасатнал аьмсса кIулшиву ххал даврил давурттив

Ноябрь зурул ахирданий Ккуллал райондалийсса шанма школалий 2-ми ва 5-ми кла­ссирттаву дуклакисса оьрчIал дянив хьунни оьрус мазрал дарсирдал кIулшиву ххал дуллалисса давурттив (Всероссийские проверочные работы). КIилчинми классирттал оьрчIахьхьун буллуну бур луттирая тетрадьрайн текст лахъан буван. Ххюлчинми классирттал оьрчIахьхьун буллуну бия хIарпру кьадиртсса текстру тетрадьрайн лахъан буван. Вай кIулшиву ххал даврил давурттал мурадну бусса бур щалагу Аьрасатнаву цасса оьрус мазрал кIулшиву дулаврил стандартру дуруччаву. Вай давур­ттай каялувшиву дуллай бусса бур Рособрнадзор.

КIилчинмур онлайн-дарс

Аьрасатнал электрон школа хъанахъиссар интерактивнайсса курсну. Ваниву лахьлахьиссар циняв дарсру, компьютерданул кумаграйну сурат дишаву, цIусса дарс дишаврил хIалурду. ЧIал къавхьуну циняв учительтураща, дуклаки оьрчIаща бюхъантIиссар «Российская электронная школа» тIисса ресурсрал кумаграйну ххал дуллан циняв дуккаврил программартту, 1-мур классрава 11-мур классравун дияннинсса видеодарсирдал лагрулий. Вай дарсру ласласисса давурттавух гьуртту хъанай бусса бур Аьрасатнал ххуй-ххуйми учительтал.
КIилчинмур онлайн-дарс дирхьунни декабрь зурул 9-нний МахIачкъалаллал шагьрулул 49-мур школалий. Ва онлайн-дарсиравух гьуртту хьунни Кку­ллал 1-мур школагу.
Дарс нанисса иширах уруг­лай ия Дагъусттаннал кIулшиву дулаврил ва элмулул министрнал хъиривчу ХIажимурад Аьлиев.
КIилчинмур онлайн-дарс дирхьунни ингилиснал (англиянал) ва ламсанал (немецнал) мазурдин хас дурну. Дарсирдавух гьуртту хъанай бия Ккуллал 1-мур школалул дуклаки оьрчIругу. Дарсирах буруглай бия школалул директор Руслан Къянчиев, ванал хъиривчу Шамил МахIаммадбагов, чил мазурдил учительтал Залму Абакарова ва ХIусван Абакаров. Шинал ахирданийннин Министерствалул уттигу укунсса ца дарс дишинсса хIукму бувну бур. 2017-ку шинал укунсса дарсру дихьлан тIий бусса бур пландалийн бувну Дагъусттаннал сайки 9 азара дуклаки оьрчI гьур­тту хьунсса лагрулий.
Онлайн-кIулшиву дулаврил хъинну кумаг буван тIий бусса бур гьарта-гьарзасса кIулшиву ласун, циван учирча, вай дарсру дишавриву гьуртту хъанан тIий бусса бур дарс дишаврил чулуха бюхъу ххисса Дагъусттаннал школарттал учительтал.
Бусан ччива ва проект «Электрон школа» биттур дуллай бушиву Дагъусттаннал БакIчи Рамазан АьбдуллатIиповлул хIук­мулийн бувну.
Дагъусттаннал кIулшиву дулаврил ва элмулул министр Шагьаьппас Шагьовлул бусаврийн бувну, циняв дирхьусса дарсру лахъан дуван тIий дусса дур хасъсса интернет-порталданийн. Интернет къазузисса школар­ттащагу гай дарсру ххал дуван хьуншиврул, гай чичин тIий бу­сса бур дискардай.
ХIажимурад ХIусайнов
Артур Амиров