Декабрь зурул 30-нний Лакрал райондалул актовый залдануву хьунни ларгсса шинал хIасиллу дуллалисса райондалул депутатътурал сессия. Муний гьуртту хьунни райондалул бакIчи Юсуп МахIаммадов, райондалул администрациялул бакIчи Абакар Къюннуев, вайннал хъиривчутал, райондалул депутатътал, идарарттал каялувчитал , шяраваллал администрациярттал бакIчитал, школарттал директортал, шяраваллил хозяйствалул предприятиярттал хъуними.
Сессия байбишин хьхьичI бавтIминнал дащуй дирхьуна декабрь зурул 29-нний ва 30-нний Волгоград шагьрулий хьусса оьсса терактру. Вай терактирдаву ливтIуми дакIнийн бичин цинявппа лавай бивзуна. Юсуп МахIаммадовлул низам дуруччай органнал зузалт ва шяраваллал администрациярттал бакIчитал буржлув бувна байрандалул гьантрай мюхчаншиву гужлан дан.
Гихунмай райондалул бакIчинал балжину бувсуна райондалул гьарца сфералуву, шяраваллил хозяйствалуву, кIулшиву дуруччавриву, цIуллу-сагъшиву дуруччавриву, социал сфералуву, жагьилтурал политикалуву, магьирлугърал аралуву дурсса ва гихуннай дан дакIнийсса давурттая. Барчаллагь увкуна цинявппагу депутатътурахь райондалул оьрмулуву хъанахъисса иширттаву дурсса чялишсса гьурттушиннарахлу.
Гихунмай цала аралуву дурсса давурттая бувсуна Райондалул КIулшиву дулаврил управлениялул каялувчи Явсупи ХIамзаевлул, райондалул больницалул хъунама хIакин АьбдурахIим Дибировлул, «Лакский» ОМВД-лул каялувчи Марат МахIмудовлул, прокурор Светозар Оьмаровлул, Финотделданул хъунмур Аьйша Амирхановал, «Ххяххабаргъ» кказитрал редактор Мусалав Мусалаевлул ва цайминнал.
