Февральданул 5-нний МахIачкъалаллал «Гимназия №7» МБОУ-рай хьунни гьар шинах дувайсса шагьрулул школардал дуклаки оьрчIал дянивсса ниттил мазурдийсса назмурдал конкурс.

Залму АьбдурахIманова
Хъунасса шаэр Р. ХIамзатов­лул «Гьунттий ттул ниттил маз бухлаган тIий бухьурча, хIадурссара на хIакьину ивчIан» тIисса мукъурттилу дувайсса ва аьдатравун дагьсса конкурс чIал къархьуну кIицI лагантIисса Ниттил мазурдил кьинилун хасну дурну дия. Февральданул 21-нний щалла дунияллий кIицI лагайссар Ниттил мазурдил кьини.
Конкурсрал сакиншинна дурну дия ДР-лул КIулшивуртту дулаврил ва элмулул министерствалул кумаграйну МахIачкъалаллал КIулшивуртту дулаврил управлениялул. Ниттил мазурдийсса назмурдал конкурсрай гьуртту хьун бувкIун бия цалва-цалва школардай хьусса шеърирдал бяст-ччаллаву ххув хьусса 9-10-ми ва 11-ми классирттал дуклаки оьрчIру.
Цалва школалий укунсса журалул шадлугъ дан бавтIсса хъамаллуран 7-мур гимназиялул дук­лаки оьрчIал ва ниттил мазурдил учительтурал хIадур дурну дия ххуйсса концертрал программагу. Гимназиялул залданул сахIналий дуклаки оьрчIал дур­ккунни лакрал, яруссаннал, даргиял, къумукьнал, лазгиял шаэртурал назмурду ва ккаккан бунни Дагъусттаннал миллатирттал бусалардавасса сценариярду.
Дурунни къавтIавуртту ва увкунни ниттил мазурдийсса балайрду.
Тяхъашивуртту ва барча бавурттал махъру лавхъун махъ циняв дуклаки оьрчIру цалва-цалва ниттил мазурдил группардайх бавчIунни.
Лакку мазрайсса назмурдал ва конкурсраву гьуртту хьун шиккун бувкIун бия № 30, №16, №1, №37, №33, №11, № 5, №50 ва цаймигу школардаясса дуклаки оьрчIру. Вайннал жюрилул хьхьичI бувккунни С.Увайсовлул, А.Мудуновлул, ХI.КIуруховлул ва цаймигу лакрал шаэртурал шеърирду. Жюрилул оьрчIаясса тIалавшиннарду дия –назму ду­ккин лахъну, бюхттулну, хIарпру дурчIинну, артистизм ишла дурну ва, духьурча, миллатрал лаххиялуву. Мяйжаннугу, гьашину дуллалимур конкурсраву гьурттуну бия хъинну ххуйну хIадургу хьусса, лакку мазгу кIулсса, цалла ккалакки­сса назмурду ва гивусса асарду дакIнивух итабакьин бювхъусса оьрчIру. Шагьрулул вайксса школардава МахIачкъалаллал №1 школалул дуклаки душ Юсупова Жамила тIурча бувкIун бия хъинну авурсса миллатрал ла­ххиялуву. Вагу дия конкурсрал ца ххуйшиву.
Жюрилуву бия жунма чIя­вучин кIулсса ва хIурмат­райсса №22 школалий ниттил мазру дихьлахьисса учитель Аьжа Аьбдулгъапурова ва №27 школалий ниттил мазру дихьлахьисса Зарина ХIанапиева.
Циняв оьрчIах вичIидирхьуну ва ккаккан дурсса конкурсрал тIалавшиннардах бурувгун, жюрилул пикри бунни утти респуб­ликалул даражалий хьунтIисса конкурсрайн тIайла буккан 9-мур классраву дуклакисса Альбина Исмяилова (№30 лицей) ва 11-мур классраву дук­лакисса Мариям Аьлиханова (№30 лицей).
Лакку мазрайсса назмурду ккалаккисса ва конкурсраву 9-ми классирттал дуклаки оьрчIал дяниву хьхьичIунсса кIанттурдан лайкь хьунни: 1-мур кIану – Исмяилова Альбина (№30 школа-лицей); 2-мур кIану – Рамазанов АхIмад (№11-мур лицей); 3-мур кIану – Щамхалова Малика (№27 школа).
10-11 классирттаву ххув хьунни: 1-мур кIану – Аьлиханова Мариям (№30 школа-лицей); 2-мур кIану – Аскандаров Заур (№50 школа);
3-мур кIану – АхIмадова ПатIимат (№33 школа-гим­назия).
ОьрчIру цинявппагу ххуйну ккалай бия назмурду, мунияту ялунчIил хьунтIисса вара аьдатравун дагьсса конкурсраву ххув хьунсса каширду дия гьашину ххув къавхьусса оьрчIахьгу.
Мунияту, гьашину ххув хьуми оьрчIругу барча буллай, чIа учин ччай бур вайминнангу ниттил мазрахсса къулагъасгу, ургъилгу ххи бувну, хIарачат бан лакку маз уттинин кIулмурнияргу хъиннува ххуйну лахьхьин ва лакку мазрайсса шеърирду ва хаварду ккалан.