1928 шинал Гъумук ттула дуснащал, Кьурайхъал Жамалу­ттиннущал, (ванал ппу, «УчитIил Эса», къакIулсса ла­ккучу га заманнай къаикIайссия), ванал буттарссичIан лавгсса кIанай, кIанил ласначIан, Къажлахъал Юсуп-ХIажиначIан, увкIсса ца адимина ккавккуна.

КIа ия дянивсса чурххал, саргъунсса лажиндарал лишаннащалсса, чансса лухIи-пурщисса инсан. Бишай яруннил лув буруллал хъуни буллалисса иттату, аькьлу ялтту нанисса кунма, аьжаивсса нур дизлай дия. Банкирай зузисса Юсуп-ХIажинан на хъинну кIулссияв ва ххирасса икIайвав, ниттин кумаг буллан икIавай тIий. Юсуп-ХIажинал: «Ва Мусаевлул арсри», — увкуна. «Загьиди», — куну, тту­хьхьун танал ка дуллуна. «Сулайман», — учав нагу. «Ина Наватлул арс ура», — увкуна танал. «Да», — тасттикь бав нагу. «Вил ппу ттул ххаллилсса дусъя. Ниттихь Феодаев ссалам буслай ия уча». Укун кIул хьуссияв на Феодаев Загьиди ХIасан-ХIусайннул арснащал.

Уттизаманнай коммунистътал оькки бувулт чIяву хьуну бур. На аьмну хIисав дурсса гайннал оькки-ххуйшиврия буслан кьаст лахIлай акъара. Заманалул цила лишан, ца дагъ рищайсса кунна, цила заманнул инсаннай къадирхьуну, гьай-гьай, къаличIайссар. Увкуну бурхха: «Залимтуращал авкьуну ялапар хъанай ивкIсса инсаннал хъунмур оьрму бунагьирттаву бувтссар» (Щайх Жамалуттиннул арс АьвдурахIман). Амма гьарица заманалуву бу­ссар ца ляличIисса, цала инсаншиву цукунчIавсса къуллу­гъирттахгу, буллугъирттахгу къадулайсса инсантурал жура. Муниятурхха цумур-бунугу заманалухлу буклакисса тарапчитал, гъалгъа тIутIийни (гьарца заманнул тIурча га яла ххуймур, яла хъинмур заманая тIисса тарапчитал, чулбугьулт мудангу бикIай), хIуччарду ляхълай, ва заманнай укун ххаллилсса инсантал буссия тIий, миннал цIарду кIицI дуллан бикIайсса. Амма гьарица заманнай цумацагу каснал тIабиаьтрал лавайсса кьимат абадлий уттавану личIан буллалисса му хасшиндарал заллухъру буссар. Мунийн бувну, ми тарапчитурал хIучча, цаймигу хIуччардал (я ми ля­къинсса бюхъу бакъа, ягу цив­ппа мяйжаннугу му заманалуву къабивкIун) авадан къабувну буцлацийни, миннаща цучIав цала тIутIимур тIайлашиврий мукIру ан къабюхъай. Гьарца заманалул кьимат, цуппа замана щаллуну ххал бивгьуну, гьарица чулуха аьч бувну, ахттар бувнур бищун аьркинсса. Гьамин, ми хIисавравун лавсунни ттун, цуппа заманалул вив къаувххун, ганиха цихава чур­ххай ва рухIирай рахIму къабувну, зий ивкIманал бакIрачIан бувкIмуния, ганайн лирксса кьинилия ттунма кIулмур бусан ччисса.
Щаллара дунияллул захIмат­каш мурахас банну тIисса, рахIму бакъасса талатавриву Совет хIукуматраща цIусса политикийсса ва экономикийсса низам дишаврищал бювхъуссар ля­къин личIиссава паччахIлугърал экономикалул кьувват гьаз бан­сса ххуллу. Му ххуллул ахирданийгу чIалай бивкIссар инсаниятрал абадлийсса тархъаншивриясса ва талихIраясса хиял. Му ххуллу, жунма кIул­сса куццуй, хIукуматрал бачин бувну бивкIссар ин­дуст­риа­­лизациялийхчIин ва шярава­ллил тIювардал коллек­тивизациялийхчIин. Дагъусттаннайгу диялсса шартIру диркIссар му ххуллийх бачинсса. Шикку къадиркIссар вари чинсса индустрия (сянатлугъ). Зунттаву агьлу ццунну яхъанай бикIаврищал, аьмну хIисав барча, кьянатсса кIану бухьувкун, ялапаршингу кьаридсса диркIссар. Мунияту заводру баврия чIявусса инсантуран давугу, муницIун бавхIуну, маэшатгу ххишала хьун най бивкIссар ва чIявусса халкь, хаснува лакрал миллатралми, гъурбатрайн хIалтIилийн заназаврия махъал хьун най бивкIссар. Га чIумал ЦК ВКП(б)-лул аппаратраву зий ивкIсса жагьилсса Феодаевлун ми масъалартту хъинну балжину чIалай бивкIссар. Цала гьаваслансса хияллу, бу­ттал кIанттул кIункIу-хъит, паччахI­лугърал планну цалийн дукIлай диркIссар – му бакъарив инсаннал яла хъунмур арши! Да­гъусттаннай МахIачкъалаллал чIарав индустриялул завод буллан хIукму кьамул бувкун, кIа­нал хIукуматрахь му даву дувз­райн дуккан дан бакIрайн ласун хIадурну ура кусса жуав дурссар.
Компартия та чIумал, ва махъ жунма ккавксса бавцIу-бувхIу заманнай куннасса, даву дуллай дура тIий, дасмачалухун дагьсса къари куннасса къадиркIссарча, гьиммат-хIарачат буллай, духхаву къакIулсса диркIссар. Ганил гьужум бай гуж бивкIссар жагьилтал. Ва хIаллай партиялул тIайла увкссар Дагъусттаннайн Феодаев. Загьидигу увкIссар, Москавлив ххаллилсса перспектива дусса давугу, гьарица рахIатшиврул балгусса къушгу кьабивтун, жиминнал ттуруллавун бахьлавгсса, чIахIлун тавт­сса, кунцIуллаву ва къундалул авлахърай ххаллилсса шагьру банна тIий.
Юх, на цIана шагьру Двигательстрой (уттисса Каспийск) буллай бувсса захIматрая буслан ччай акъара, цанчирча му жапалувух гьурттухьуцириннава сагъну ливчIсса ттигу бур, ттулгу умуд бур я миннал цала чичинссар, я кказитрал зузалтрал, цIухху-бусу бувну, чIалачIи бан­ссар тIисса. На бусан ччай ура ттула буттая Мусаев АхIмадия ва ттула ниттия Шурпаева Наватлуя ттунма бавмур.
Та чIумал дахьва МахIачкъа­лаллал индустриальный техникум бувккусса ттул ппу жагьил­сса, хIарачат бусса къучагътурах луглагисса Загьидинан бакIрайн агьну ур. Шаэрнал кунна, шавкьирайсса дакI дусса Загьидинал (учин мукъун, ганал шеърирдугу чичайссия) мяйжаннугусса иширах мюхтажсса ттул буттал дакI щаращи дурхьунссия, вагу цала хъирив лавхIуну ур. Буттал бусайва: «На, даврил цукунчIавсса вардишшиву дакъасса оьрчI, Загьидинал увцуну, хъинну жаваблувсса къуллугърай ацIан увнав, ва ганаяту ларсъсса инсантуращал макьу дакьин давриясса, ара дазавриясса дарс ттул ттуйнува нава ласласисса оьрмулул цалчинсса цIакьсса шачIанттуну хьуна», тIий.
Амма та замана анжагъ ххувшавурттал ва тIайлабацIурттал бувщусса къабивкIшиву жунма кIулли. Та замана виричушиву ва кьадаршиву, чумартшиву ва хIусудшиву, дакIнийхтунушиву ва лавмартшиву цачIу ца рукI­лилун даркьуну зузисса замана бивкIссар. Уттизаманнай та замана зия баншиврул, оькки­мур бакъа хIисавравун къала­слай, ай та чIумал ацIва миллион аьйдакъултрал ливтIуссар, 20 миллион ливтIуссар тIий, оьши­ву хъун даншиврул тарихру бястлий хъуни буллан бикIай. Буцинсса далил къаливчIукунни инсан тарихирттахун агьай­сса. Оьбалалул гужмур, тагьарданул мусиватсса жавгьармур вари – шама ламмам (на оьшиврул машгьур бувсса «тройкалуя» гъалгъа тIий акъара, на укуна­сса шама ламмамнаяра гъалгъа тIисса), шама ламмам цачIун хьуну: «Бачи, пулан бат аннуча», — учирча, му бан бюхълай бивкIссар.
Лявкъуну бур ламмамтал Феодаевлуягу аьрза бансса. Ниттил бусай, кIанащал Пуго, Радикович, Кудряшов тIисса арамталгу бувгьуна, куну. Га ца директоръя тIар, гама – заместитель, Кудряшов – учебный комбинат­рал директор.
Феодаев ялапар хъанай ивкIун ур шагьрулий хьхьичIра-хьхьичI дурсса къатраву (ми дуссар Каспийскалий муххал ххуллул ликказандалучIа) кIилчинмур зивулийсса хъун бакъасса пукьлуву. Та увгьу­сса чIумал, танал къатлуву аьрис рирщусса манкьулатрагу анжагъ муххал тах, Лениннул сурат ва Лениннул ва Сталиннул цаппара жилдру бивкIун бур. Вакссава мискинну цукунни ялапар хъанай ивкIсса ххаллилсса къуллугъирттай оьрму бутлатисса инсан? Аьжаивсса хасиятрал заллу икIайва тIар Загьиди. Профессор Буттаев МахIаммад Жалалуттиннул арс буслай ия, ганал аьхълахъисса зузала ккавккукун, ливккун хъарая цала рахIу булайсса бивкIун бур, тIий. Цащала зузисса инсантурал гьарцаннал ахIвал-хIал, гай ци кашилул заллухъру буссарив, цума ссах мюхтажну уссарив оьрмулул мяъна арцуву чIалачIима, ЦК-лул аппаратрава увккун, укунасса парторгну заводрайн къаучIайссия. Га ивкIун ур мяйжаннугу идавсилсса хасият ду­сса инсан.
«Вагъар, та адимина бат шавай урхха, лажинни, зуща дустураща, та ххассал ан къабюхъай­ссарив?» — увкуссия тIар ниттил. Амма цинмагу бувчIлай бухьун­ссия къабюхъайшиву. Гава ппурттуву шама шяравучунал, дянивсса кашилул къалайчину ивкIсса ттул буттал ппу Сулайманнуя кулак увну, «чагуртътал икспулуатироват» буллай ивкIсса тIий, ттул бутта цувагу гьанагьи увну ивкIссар ва анжагъ цала хIарачатрал мурахасгу увссар. Амма му цамур хаварди.
ЖучIа дикIайссия тIар, мукьва 9х12 фоточагъар кунничIа ку бивхьуну (сурат рищучIа хъунмасса фоточагъар бакъахьун­ссия), хъунна дурсса Феодаев Загьидинал сурат. Тти, цуксса нигьачIакIул бувну бивкIун бурив инсантал, зува хIисав ласияра, га сурат, цала экьиличингу дакI къадиллай, ниттихь бат дува увкуну бивкIун бур буттал. Цищагу му дан шайсса къел да­къая тIар, сурат, хIаммам-къатлуву ванналул махъун лиркIуну, лариртссия тIий, бусай ниттил. Яла махъ, кIира шинай хъирив лаллай, силистталул тахсир ля­къин къабювхъуну, итаавкьусса чIумал, жунний цала сурат ляркъукун, ххарину махIаттал хьухьунссия Загьиди.
Мяйжаннугу, аьй лякъин къархьуну, Феодаевлул лажин кIяла дурссар:

«ДаянтIиссар», — кувкун,
вихшала дурну,
На ссапар бавхIуссар,
дакъа лаххия,
Амма, хъирив ларну
лухIи-цIан ттурлу,
Чявхъа-гъаралданул
дунни ттуй къия.
Утти ва микIирал
дарттусса лажин
Вил чаннасса тIинттал
дарчагу кьакьан,
Ттун цирар – хьурчагу ттул
щавурду хъин,
ЦIунцIия дуллайнна
лирчIукун кьякьа?
(Шекспир. Сонет №34).

Амма, я цIуницIа цала був­сса шагьру Двигательстройрайн горкомрал секретарьну, ягу – хъиннува! ЦК-лул аппаратравун гьан къаувссарча, цала жяматрал колхозрал зампредну увчIуну, цала хасиятрангу хас дакъасса даву дачин дан увну, оьрмулул ша­ттирду цIуницIа ласласи инсаннайн уккан багьну бур ганан.
ЧIунни уттивагу та бусравсса инсаннал кьимат бищун. Мунияту нагу ттула чIу Каспийскаллал ветерантурацIун бахIлай ура. Ттухь цIуххирча, та шагьру бан сиптачигу хIисаврай, шагьрулул гьану бивзмагу ва буллай ивкIмагу хIисаврай, Каспийскаллал шагьрулул яла ххуймур кIичIираваллингума Феодаев Загьидинал цIа дизаву лайкьссар ва му кIичIираву ганал гьайкал дацIан дан аьркинссар.
Сулайман Мусаев,
ш. Кьукун
«Илчи» №50, 1994 ш.