Вай бувкIун бия «Илчи» кказитрал коллектив ялун нанисса юбилейращал барча бан ва му тIайла дуккан цала чулухасса кумаг бан. «Дараччи» клуб сакин бувния шихунмай, 18-гу шинал лажиндарай ва клубрал цIакьсса дусшиву дуссар «Илчи» кказитращал.
Цалва миллатгу, мазгу ххирасса, миннул бучIантIимуний буруккинттарайсса «Дараччи» организациялувусса лакку душру ва миннал бакIчи Мариян ЧIибиевна кказитрал дуллалисса чIири-хъунсса гьарица даврил чIарав буссар. ХIакьинугу, «Илчилул» юбилей гъан хъанахъисса гьантрай, Мариян ЧIибиевна оьвтIий бур цинявппагу махъ нанисса, каши дусса, чумартсса лакрайн миллатрал кказитрал юбилей лайкьсса даражалий тIайла дуккан чIарав бацIияра, шайнал шайсса кумаг бувара тIий.
-ХIурмат бусса лакрал жямат! Вай 25-гу шинал лажиндарай «Илчи» кказитрал багьа бищун къашайсса даву дурссая. «Илчи» кказитрая кIул хъанай бия жунма Дагъусттаннай, билаятрай, дунияллий хъанахъимур, кказитрал буслай бия жухьва миллатрал дянивсса иширттая, щаллагу дунияллийх кIама бивщусса лакрая, дуккаврил, спортрал, элмулул ххуллий ххуйсса ккаккияртту чIалачIи дурсса бусравсса миллатрал вакилтурая.
Уттиния тихуннайгу ва бусравсса даву дуллан, жулва кказит буруччин хIарачат бан аьркинссар жува.
Миллат бухкъалаганшиврул жунма хьхьичIва-хьхьичI буруччин аьркинссар жулва маз. Му буссакссар миллатгу бусса, миллатрал сийгу дусса, жулла аьдатругу дусса, жулла тIабиаьтгу дусса, багьу-бизугу жуласса бусса. Лакрал миллатрал оьрчIрув, душрув! На оьвтIий бура зуйн, лагма лагияра, жулва миллатран бакъа чара бакъасса кказитрал чIарав бацIияра тIий. Юбилейращал барчагу буллай, дакIнийхтуну барчаллагь тIий бура цалла даву лавайсса даражалий дуллалисса, жулва маз буруччин хIарачат буллалисса редакциялул зузалтрахьгу, хъунмур редактор Качар ХIусайнаевахьгу. ЦIуллушиву дулуннав, 50 шин дуллалисса чIунгу ккакканнав. Жулва кказит махъсса никиртталгу ябувну лякъиннав.
Зуха дуаьлийсса
Мариян Илиясова
