Уттигъанну дунияллийн бувккунни профессор, филологиялул элмурдал доктор Сулайман АхIмадовлул МахIаммадхIажи ХIажиевлул (ЧукIундалавл) творчествалун хас бувну чивчусса «Назмурду» тIисса лу.
Ттинин ЧукIундалавл оьрмулия ва творчествалия чивчуну бивкIссар шаэр, аьлимчу Абачара ХIусайнаевлул,1988 шинал му реабилитироват увну махъ. Жуна ЧукIундалавгу, шаэр хIисаврай, гьарта-гьарзану кIул хъанан ивкIун ур му чIумал.
Сулайман АхIмадовлул бусаврийну, тани Абачара ХIусайнаевлул кунна, цIанагу луттирансса хIадуршинна дуван, къалавми асардалгу хъирив лаян, ванал ишла бувну бур Дагъусттан Республикалул ФСБ-лул управлениялувусса ЦГА-лул архивравусса ЧукIундалавлуясса чагъарду ва ванал канихчичрурду. ВайннихчIин бювхъуну бур ванал оьрмулул ххуллугу, тай шиннардий хъанай бивкIмунил суратгу хъиннура исватну ва аваданну чIалачIи дуван. Архиврал чагъардаву ЧукIундалавл назмурду ВицIхъиял лугъатрай аьжамрай чирчуну дусса дур. Сулайман Хановичлул, шаэрнал чивчумур бусса куццуй бивтун, ВицIхъиял лугъатгу ябувну бур.
Шеърирдал мяъна-мурадрах урувгун, лу мукьва бутIуйх бавчIуну бур. Луттирал хьхьичIмукъуву бувсун бур ЧукIундалавл оьрмулия ва творчествалия. Луттирал ахирданий бивщуну бур бувчIинбавуртту дусса лакку мазрайсса ва оьрус мазрайсса словарь.
Хъунмасса барчаллагь тIий ур Сулайман АхIмадов лу итабакьин цала чIарав бавцIусса ДНЦ РАН-рал ХI. ЦIадассал цIанийсса Мазрал, литературалул ва искусствалул институтрал литературалул отделданул пишакартурайн ва аьлимтурал советрал вакилтурайн, рецензентътал Э. Аьбдуллаевлуйн ва С.А. Бедирхановлуйн, институтрал директор М.И. МахIаммадовлуйн, республикалийсса ФСБ-лул архиврал ва Госархиврал пишакартурайн. Луттирал тираж дур 300 экземпляр.
З. АьбдурахIманова
