Ххирасса «Илчи» кказитрал къуллугъчитал!
На дакIнийхтуну барча буллай бура зу циняв кказитрал юбилейращал. ЧIа тIий бура зун цIакьсса цIуллушиву, даврих­сса гъира, даврил мурадру бартбигьлай букъаххаву.Гьаз хьуннав, гужлан хьуннав зул кказитрал сий, агьамшиву цIакь хьуннав, аькьлулул авадан хьуннав, кIулшилул бусрав баннав. ДакIурдивунцIуллушиврул пурх чиннав. Дунияллий буцири цайми кказитирттащал лачIун бувккун, «Илчилул» цалчинмур кIану бугьаннав.

«Илчи» кказитрал юбилейраясса баян баву дурккукун, дакIнин багьунни ттула кказитирттащалсса дусшиврул дайдихьу хьусса куц.
ОьрчI заманнай, цалчинмур классравун заназисса чIумал, цамур классрал учитель Чупалав МахIаммадович увкIун: «Зу, гьарицаннал, «ЦIусса ххуллу» тIисса кказит чичин аьркин­ссар», — увкунни. Фамилия «А»-лия дайдихьлай тIий, на биявав хьхьичIва-хьхьичI, учитель ттучIан гъан хьунни. Кказит цукун чичайссарив къакIулну, къакIулли учингу дия нач хъанай. Ттун ххива га халкьуннал буккайсса кказит ттухьва чичи тIисса. Ттухьва нава бура, га кказит чичайсса чагъар чув лякъай­ссар, гикку куннасса хIарпру цукун дишайссар тIий. «На тачIав кказит къачивчуссар», — учав на буккавай, къабуккавай. Циняв­ппагу цIитI бивкIун ттух ялугьлай бия. Му кьини щилчIаввагу къачивчунни кказит. Яла ша­ппа ниттихь цIувххукун, бувсунни ганил кказит чичайсса куц. Цукуннугу, жу цинявннал чичарду «ЦIусса ххуллу» кказит. Ца-кIира шинава, нава 4-мур классравун заназисса чIумал, цакуну классравун увххунни Григорий тIисса оьрус учитель. «Выпишите газету «Новый путь», — кунни. Жу циняв му «Новый путь» чичинну тIун бивкIру, бизар хьунну ва «ЦIусса ххуллу» тIисса кказитрая тIий. Уривав дунияллий Григорий?
ЦIанакуллив, вай махъсса 20 шинай, гъирарай буккара «Илчи» кказит. Ялугьлай ля­къара нюжмар кьини дучIаннин. На школалий дуклакисса чIумал нитти-буттал ттун, цайминнал бакъасса, чIявусса кказитру, журналлу чичайва, гания махъгу на чIявусса кказитру буккайссия, амма ва «Илчи» кказитрачIан цавагу къабияй. Ттун ххан бикIай ххуйсса хавардугу лавсун, оьручай бурттий ттучIана чапар учIайсса куна. Аьламатсса кказит бур ва. Ши­кку Дагъусттаннал ва хIукуматрал хъуниминная, гайннал хал­кьунначIансса ххуллурдая, кьатIаллил хIукуматирттащалсса дахIавурттая, халкьуннал хIал-ахIвалдания, личIи-личIисса цIушивурттая бикIай. Дяъвилул гьурттучитурая, къучагътурая, Лаккуй хъанахъимуния, гьарица идарарттавусса дахханашивур­ттая, бувсса ххуллурдая бувсун бикIай. Кказитрай дур адабият­рал лажин, мюрщи оьрчIан хас дурсса «ЧIимучIали» тIисса лажин, бур духтурнал маслихIатру, личIи-личIисса баян бавуртту. Ва кказит бур ххюва цайминнул багьасса. Ва буккайнан я телевизор, я интернет къааьркинни. Ва ккалаккиний, ттул дакIнивун ца аьжаивсса, чурх цIу лаглаги­сса кунмасса асарду буххай. Нава лакку билаятращал хьунабавкьусса кунма шара.
Ци байссар му кказитрал, ми цимурца интернетраву бур­хха тIиссагу бур. Ва «Илчи» кказитрал чIапIив каниву щурущиний наварив ттунна дуниял тIиртIусса кунма бикIара. Ванил бур лакку инсантал къакIулмигу кIул буллай, архмигу гъан буллай, щархъал ва шагьрурдал дяних дахIаврил, дусшиврул ламу бихьлай. Шикку хIатта жижаралул лажин дур. Ккалан захIматну бунагу, къабавнан баян, вагу чара бакъа аьркинни. Вай цимурца бакъассагу, «Илчи» кказитрай захIмат буллай бур ттула дакIнил лавсъсса иминсса инсантал: Качар ХIусайнаева, Руслан Башаев, Руслан Къардашов, ХIасан КIурухов, Андриана Аьбдуллаева, Амин Аьбдуллаев, ПатIимат Рамазанова, Зулайхат Тахакьаева ва м.ц.
На цинявннаннагу цIакьсса цIуллушиву чIа тIиссара. Зу цинявппагу, зулва захIматрая рязину, халкь зуяту рязину, ххарину личIаннав. Зулва захIматрал зу хъун баннав, даврил иширттал хъихъи ласуннав, «Илчи» кказитрал даража ва дунияллийсса яла агьамми, машгьурми кказитирттащал данди бу­ккан шай­сса кIанттайн бияннав, каши ххи хьуннав. Ва дуниял гьанай дуссаксса, «Илчи» кказит халкьуннан чан къахьуннав, хьхьичI бивхьусса масъалартту бигьану щаллу хьуннав. Цайминнаща къашаймургу «Илчи» кказитрал редакциялуща хъанай, хъунисса иширттал сиптачину, маслихIатчину лякъиннав.
Нагу зуйн икрам буллалисса зул дуаьчи Ханича