Шяраваллаву, шагьрурдай яхъанахъисса инсантурал цалва ялув каялувшиву дуллалисса къуллугъчитуран «кьимат» бишаву дархIуну дикIай яхъанахъисса кIанттурдай бигьашивуртту хIасул даврицIун. Дуссарив жула зунттавусса шяраваллаву мукунсса бигьашивуртту? Ва суалданун жаваб дуллай: «Бигьашивуртту дусса кIанттурдугу буссар. Амма захIматшивуртту думи кIанттурдугу чансса бакъар», — куну учин хьунссар.

ХIажимурад ХIусайнов
Ккуллал райондалул Ветерантурал советрал председатель Загьидиев Аьбдуллул ттухь бувсуна Хъусращиял шяравасса мушакъатсса инсан, цIусса шинаву дурсса дахханашивурттайн бувну, цала шаппа харж бувсса чаннах арцу дуллусса квитанция ларсун увкIун ивкIшиву Ваччав социал идаралийн. Га квитанция ккаккан къадуварча, ганан чаннахсса хIукуматрал ккаккан дурсса куклушиву къадуллай душивугу кIицI бувна. Ва цара захIматшиву. КIилчин, ларгсса шинал Ваччату Хъусрахьхьун бияннин занай бикIайссия инсантал кIихунмай-шихунмай буцлацисса маршрутка. Багьагу, инсантурал жипан куклусса, 20 къуруш дикIайва. Вана утти ва маршрутка бакъа кIива-шанма барз лавгунни. Гана га муша­къатсса адамина Загьидиев Аьбдуллухь: «На утти кIихунай цукун гьантIиссара?» — тIий ивкIун ия. Вагу кIилчинмур захIматшиву. Укунмасса, Хъуннеххал тия чулийсса ххюра шяраваллава Ва­ччав даврийн заназисса инсанталгу буссар, муданма заназисса маршрутка бакъашиврийн бувну, бахьтта занай. На нава Вихьлияту 10 километралийх гьарца кьини лагара Ваччав ахьтта. Гьай-гьай, машиналуву кIану бухьурча, хъирив лавсса машиналул залуннал на укъавцуну къаитара. Хъунмасса барчаллагь тIиссара. Ца-кIива гьантлул хьхьичI МахIачкъалалия Лаккуйн нанисса маршруткалий щяивкIсса ЧIяйннал шяравасса ца адамина ия: «Жул шяраву гъаттарал хIачIансса щин да­къассар», — тIий, цIуру-кIурулий. Шикку ца укунсса зат кIицI буван ччай бур. Жула аьдат дур «ттукку бувккун махъ ттала бутлан бикIайсса». Шяраваллавун цила чIумал, хIукуматрал арцу итадаркьуну, дурцуну диркIссар щин. Амма гай дуцлацисса чIумал шяраваллал бакIчитурал дурсса биччибакъулшиврийну, щинал бургъурду цила багьай­сса кьяйдалий куртIну къабу­ччаврийн бувну (Ккуллал райондалий яла куртIну аьрщи микIлачIавуну хъанай дусса дур 120 см.), бургъурдавусса щин микIлачIлай дур.
На цакьнивагу цимилагу чичав, уттигу цIунилгу кIицI буллай ура: Хъюйннал шяраваллил лувсса Хъуннеххайхсса ламучIан нанисса ххуллул дулама, кIия, гьанату нанисса щин, марххала баслай, кIинттул микIиран дакьлай дур. Шичча ялавай цакьнивагу Ккуллал шяравасса инсантал бусса машина багьуна. Аллагьнал бурувччухьунссия, цIунцIия хьурча дакъа, ххишала цичIав къавхьуна. Уттигу ва ххуллу пюрун микIирайн був­ккун бур.
Утти зана хьунну макьалалун цIа дирзсса масъалалучIан. Ккуллал райондалий Энергосбытрал идаралул зузалт шяраваллавусса инсантурал харж бувсса чаннах­сса арцу ласун бучIай графикрайн бувну. Амма шиккугу инсантуран куклушиву хьуншиврул бучIияхха мукунма, вай арцу ласаву райондалийсса почтардайх дулларча. На ихтилат бувсса райондалий­сса почтардал хъуниминнал бувсунни вайнначIа душиву компьютердаву мукун арцу ласун бю­хъайсса программартту. Шиккусса дайшишру хъанай дусса дур ва иш биттур буваншиврул Лакрал ва Ккуллал районнал Энергосбытирттал идарарттал Лаващавсса жула почтарду хъарсса почталущал кьутIи къачичлачаву.
Куклу дуллалияра, къуллугъчитал, жула зунттаву яхъа­нахъисса инсантурал захI­матши­вуртту!