ОьрчIру буруччаврил байран муданна кунна лахъа-хъунну кIицI ларгунни ЦIуссалакрал КЦСОН-далул Новостройрайсса цIуллушиврул ссуссукьушиву дусса оьрчIансса реабилитациялул отделениялий.

Шадлугъ хьунни ва идаралул хIаятраву. Байрандалийн бувкIун бия ЦIуссалакрал райондалул администрациялул хъунаманал хъиривчу Алик Исрапилов, Чапаевкаллал шяраваллил бакIчи МахIаммадпаша Аьбдуллаев, ЦIуссачIурттащиял шяраваллил бакIчи Юсуп Аьли­ев, ЦIуссалакрал шяраваллил бакIчи ХIажи Сайпуллаев. ОьрчIан тирхханну, талихI, цIуллу-цIакьшиву чIа тIутIисса ихтилатру бунни бусравсса хъамаллурал.
Шадлугърал мажлис бачин бувну бия центрданул зузалт Милана Адамова ва Халун Ма­хIаммадова.
Мажлис тIитIлай, оьрчIру барча буллалисса ихтилат бунни отделениялул хъунмур Малика Жамхатовал.
— Ххирасса оьрчIрув!
ХIакьину зул тяхъасса симанну чIалай, ттул дакI ххари хъанай дур. Ттун ччива зу муданма мукун хъяйнма, мукун ххаринма. Зул оьрмулуву байранну, ххарисса кьинирду чан къахьуннав. Ттун ччива цинявппа оьрчIал дадахъулгу, буттахъулгу буну, дуниял паракьатну, дяъвирду бакъа, — увкунни Малика Сурупашаевнал.
ОьрчIал байран хъиннура тяхъа дунни Саният ХIусайновал каялувшиндаралусса ДучIиннал шяравусса ОьрчIал творчествалул къатлул коллективрал.
Ва байран хъуннасса тир­хханнуну хьунни цIуллу-сагъ­шиврул ссуссукьушиву ду­сса оьрчIан. ОьрчIру тяхъа бу­ккан баву мурад­рай, байрандалийн бучIан бувну бия Ссихьрал театр­данул аниматортал, артис­тал. Вайнналгу байрандалийн бувкIцирив таза-тяхъа буккан бунни. ОьрчIал цалагу бувккунни шеърирду, увкунни балайрду, ккаккан дунни къавтIавуртту. Байран дайдишиннинма оьрчIал дянив баян бувну бия сурат дишаврил конкурс. Му конкурсраву ххув хьуминнал цIарду кIицI ларгунни байрандалул мажлисрай.
Шадлугъ наниссаксса хIаллай оьрчIайх дачIлай бия мороженое, лимонад, нацIу-кьацIу.
ОьрчIан ва ххаллилсса байран дан чIарав бавцIуну, ка-кумаг бувну бур «Оскар» тIисса машлул къатлул хъунмур Хасаева Гульшаннул, «Таис» ООО-лул директор УсттармахIадов Варал, «Рамас» машлул къатлул директор Штанчаев Муслимлул, 888 – гостиницалул комплексрал директор Аьлиев ХIасаннул, «Норма» ООО-лул хъунама Кьурбанов Камалуттиннул, ЦIуссалакрал 2-мур азарханалул завхоз Исмяилов МахIачлул, «Новострой» СМУ-рал строительствалул компаниялул хъунама директор Аьлиев Аьлил, «Дагпродуктрал» хъунама директор Булатов Темирланнул, ЦIуссалакрал школалул учительница Бариева Асиятлул.
Хъунмасса барчаллагьри, бюхълай личIаннав, каши ххи даннав!