Мубараксса Кьурбан байрандалул гьантрай Хьурттал шяраву хьунни Аллагьгу рязисса, жяматгу ххарисса иш –тIивтIунни федерал агьамшиву дусса объектран ккаллисса цIу буккан бувсса хъинну хьхьичIавасса мизит. Му ишираву гьуртту хьунни райондалул каялувчитал, ттигъанну Ухссавнил Ккавкказнал жяматий­сса советрал хъунаману ивтсса Анвар ХIажиев (ХIадис Аьбдуллаевичлул арс), Лаккуй хъанахъисса иширттая тачIаввагу ят къауцайсса Аьлил АхIмадов, шяравува ялапар хъанахъиссагу, шагьрурдая бувкIссагу Хьурттал жямат, респуб­ликалул бусурманнал рувхIанийсса идаралул вакилтал.

Зулайхат Тахакьаева
Дуаьрттугу дурккуну, Лакрал райондалул имам Бариев Маннардул бувсуна хьхьичIавасса мизитрал тарихрая.
Хъирив Лакрал райондалул бакIчи Юсуп МахIаммадовлул бувсуна мизит цIу буккан бансса сиптачигу, спонсоргу хьушиву Аьрасатнал Конституциялул судья ХIадис ХIажиев.
— ХIадис цала ниттил къатрайн иян увкIсса чIумал лявкъуну бур ­аьраб мазрай чичру дусса чару. Га чарий ванан итталун дагьну дур цала ниттил буттал ва ниттил цIарду. Мизит цIу буккан бувну бивкIун бур ХIадислул ниттил бу­ттал, цала душ дунияллийн буккаврин хас бувну.
ХIадис Аьбдуллаевичлун пикри хьуну бур мизит хьхьичIарасса архитектура зия къадурну, бивкIсса кьяйдалий ччаннай бацIан бан.
Махъсса шиннардий 10-нния ливчусса мизитру бувунни жучIава. Ттигъанну мизит тIитIарду Кьукуннал шяраву. Райондалий сайки царагу шяравалу лирчIун ду­ххай акъара мизит бакъасса. Амма ва хIакьину тIитIлатIисса мизит ляваличIисса мизитри,хъинну хьхьичIавасса, шамилва-мукьилва ттинингу бакьин бувссар.
ХIадис Аьбдуллаевичлул умуд бия ва мизит анаварну тIитIин, шивун жямат зананшиврул. Гихунмай лагма-ялттусса кIанттугу цин лайкьсса тагьарданийн бувцуну, мурхьругу бувгьуну, цала ниттил къатригу цIу дуккан дурну, ялунчIил чIявусса хъамаллурайнгу оьвкуну хъуннасса шадлугърай тIитIин.
Мизит бакъасса шяравалу бусурманнал дикIан къабучIиссар. Амма миннуй цIу къабикIантIиссар, мивун жямат къазанарча. ЧIарах къабувккун, бувххун Аллагьнайн дайсса аьдат-эбадатгу дурну, лагма-ялттусса кIанттурдугу марцIну буруччин жяматрал ялувсса буржри, — увкуна Юсуп МахIаммадовлул.
Бувсуна жула хъунасса аьлимчу Сайпуллагь-кьадинал цIаницIун бавхIусса ца ишираягу:
-Къарачай-Чаргаснавун лавгсса чIумал ттун хьунаавкьуна гайннал мэр. Гъумучатусса усса бавукун, га Сайпуллагь-кьадиная гъалгъа тIий айивхьуна. Американавун медициналул зузалтрал конференциялийн Совет Союзраясса делегациялувух Ухссавнил Ккавкказнава лавгун ивкIсса Къарачай-Чаргаснавасса профессорнал бувсмур. Вай Ухссавнил Ккавкказнава бувкIсса бушиву кIул хьувкун, Англиянавасса профессор айивхьуну ур Сайпуллагь-кьадиная буслай. Цаннив ганал цIарагу цалчинъя тIива баллалисса. Тиха зана хьуну махъ хъирив лаллан бивкIукун, кIул хьуну ур га аьрабгу дурккусса, медициналиягу хавар бусса хъунасса аьлимчу ивкIшиву. Жунавагу къакIулсса ватанлув дазул кьатIувгума машгьурну ивкIун ур тIий буслай ия.
Сайпуллагь-кьадинал заманнай мизитирттаву так дин лахьхьин дуллай къабивкIссар, чIяру –чIярусса цайми элмурдугу лахьлай бивкIссар буттал-буттахъачIа. ХIакьинусса кьинигу администрациялул чулуха дакъассар цукунчIавсса диндалийн къарши бацIаву Мизит буллалисса кIанттай чIаравгу бацIлацIиссару. Амма мува чIумал учин ччай ура, диндалул жула ца ххуллур бусса, жула буттал буттахъул най бивкIсса. Дин даччан дуллалиминнайнни къадагъа дуллалисса.
Мизитрал мархри куртIнивун нанисса бушиврий чIурчIав дуллай, Лакрал райондалул имам Щайхмурад ХIажимурадовлул цала ихтилатраву кIицI лавгуна хIакьину ислам террордануцIун, зулмурдацIун дахIлай бушиву.
— Ислам зулмулия архсса динни. Хъинбала бан каши дакъа бухьурча, оьбалагу мабувару, куну бур МухIаммад Идавсил (с. аь. с) цала хIадисирттаву. Яла нигьачIисса бала бур Аллагьнал ххуллийру тIий, чIавасса оьрмулул жагьилтал баччан буллалаву. Гьарца аралуву хасъсса кIулшиву дусса пишакар уссар. Ци-дунугу цIуцIиний жува хIакиннайн буккару. Диндалувугу буссар цала даву ларайсса даражалий кIулсса имамтал, жунма къабувчIаймур бувчIин буллан буржлувсса. Цинявппагу бусурман уссурвалли, ссурвалли, жува укунмагу мюрщисса миллатру буру ца диндалул цачIун бувсса, — увкунни ванал.
Муфтиятрал вакил Рамазан-хIажи Исяевлул кIицI лавгуна исламрал дин хьхьичIуннай давриву лакрал аьлимтурал бунияла агьам­сса кIану бувгьушиву. Ухссавнил Ккавкказнал чIявусса аьлимтурал. Сайпуллагь-кьадинаща ларсшиву кIулшивуртту. ХIакьину шяраваллаву мизитру цIу буккан буллай бушиврулгу бусласиссар лакрачIа буттахъал аьпа буручлай бушиву, ватан ххирашиву, Аллагь дакIний ушиву.
— Нава дунияллий буну ва мизит цIу буккан баврия ххарину бура. Цанчирча ттул буттал, аьпа­биву ЦIаххуйл ва мизитраву лавхьхьу­ссар Кьуръан. Арулла шинаву ттул буттан чак бангу, дакIних Кьуръан буккингу лахьхьин бувну бур ГьунчIукьатIатусса имам ттул ни­ттил буттауссил, ХаннахIажинахъал агьулданиясса кIийла хIажлийнгу лавгсса халкьуннал хIакин ХIа­пизлул.
Ванал ка-кумаграйну ду­ккин увну ур Къаирдайсса Аль-Асхар тIисса дунияллий ца яла хьхьичIавасса ва хIакьинусса кьини ца яла машгьурсса исламрал университетраву. Дугу-дурккуну дахьа тиха зана хьусса чIумал, репрессияртту дайдирхьуну дия. Ва мизит­раву увгьуссар ттул ппу, — тIий буслай бия шагьрулия буттал шяраву мизит цIу буккан баву барачат бан бувкIсса Таибат.
Хьурттал жяматрал цIания мизит цIу бан харж буккан був­сса ХIадис ХIажиевлухь, буллай байбивхьуния шинай Кисловодскалия укIлай, шаймунил кумаг буллай ивкIсса Аьлил АхIмадовлухь, зий бивкIсса усттартурахь, чIарав бавцIуцириннахь барчаллагь увкуна шяраваллил бакIчи Заур СутIаевлул.
Ихтилатирттая махъ мавлудгу дурккуну, жяматрай ахттайн чак бувуна.